Feijóo: "Chegou o momento de dar un paso adiante e non vivir nunha burbulla"
Ve a Galicia "preparada" para a reactivación e as catro provincias "en condicións" de cumprir a pesar de non ter aínda datos concretos do estudo epidemiolóxico encargados.
Por Europa Press / Redacción | SANTIAGO DE COMPOSTELA | 30/04/2020 | Actualizada ás 19:20
O presidente da Xunta, Alberto Núñez Feijóo, ve a Galicia "preparada" para a reactivación económica e social, e considera --a falta de que o Goberno "concrete" parámetros "obxectivos" para poder dalo por "pechado"-- que as catro provincias poderían estar "en condicións de cumprir" os distintos requisitos para avanzar nas fases de desescalada tras as restricións pola pandemia. "Non podemos seguir nunha burbulla", dixo.
Tras presidir a reunión semanal do seu Executivo, Feijóo repasou os datos galegos --con 551 falecidos-- e reiterou que tanto a taxa de letalidade como a taxa mortalidade na Comunidade están entre as máis baixas do país, á vez que insistiu en que o Goberno debería facilitar información do conxunto de autonomías para poder facer comparacións "homoxéneas".
Con todo, dixo que chegou o momento de dar un paso adiante porque non se pode "seguir vivindo nunha burbulla" e é preciso acometer "a reactivación económica e social". No caso de Galicia, analizando os datos epidemiolóxicos e tamén a capacidade sanitaria, deu por feito que está "preparada" para iso.
"MOI BOA SITUACIÓN"
"Galicia encara esta nova fase con indicadores epidemiolóxicos e unha capacidade sanitaria que nos colocan nunha moi boa situación", sinalou, antes de incidir no descenso de pacientes COVID en UCI "do 73 por cento respecto ao pico da pandemia" ata situarse en 47. Tamén aludiu ao descenso de contaxios, aínda que segue habendo "goteo" porque Galicia é das comunidades que realiza "máis PCR" e xa está "a finalizar o testeo" en residencias de maiores e de persoas con discapacidade.
"Estamos nunha posición sólida desde o punto de vista sanitario e tamén tendo en conta os datos de ocupación de camas e equipos de reserva en UCI e respiradores", suliñou, antes de engadir que considera que Galicia está "preparada" para iniciar a reactivación económica e entende que "cumpre as condicións".
Iso, a pesar de non ter datos do estudo epidemiolóxico encargado cuxos primeiros datos apuntan a que Galicia non estaría pouco exposta ao virus e, polo tanto, é máis vulnerable. "Necesitamos criterios obxectivos, coñecer parámetros e datos serológicos contrastables e contrastados. E é o que pedirei na conferencia de presidentes do domingo", avanzou.
A MAIOR PARTE DO TERRITORIO, EN CONDICIÓNS
Feijóo alegou que non se pode permitir que España "se mova en función de impulsos dunha orde" do Ministerio de Sanidade e, por iso, insistiu en que é necesario que as comunidades coñezan os "criterios concretos" que se van a aplicar, así como os cortes. De feito, reiterou que eses criterios deberían pactarse coas autonomías.
"Sobre se penso que as provincias cumpren ou non? Se soubésemos os criterios poderíao dicir de inmediato", reflexionou, antes de engadir que, aínda que non se pode dar completamente por pechado, na súa opinión, se poden "estar en condicións de cumprir". De feito, lembrou que hai 140 concellos sen coronavirus que "poderían ir á fase tres directamente".
"Na miña opinión (as catro provincias) poden estar en condicións de cumprir. Non se se algunha área concreta non, pero con carácter xeral, a maioría de territorios e distritos das áreas sanitarias cumpren cos criterios", manifestou.
