Escolas infantís galegas rexeitan "ter que abrir" as súas instalacións na Fase 2
Este tipo de centros cren que "as medidas de distanciamento social" serán difíciles de manter e pregúntanse "como van seguir facendo o seu traballo".
Por Europa Press / Redacción | SANTIAGO DE COMPOSTELA | 03/05/2020 | Actualizada ás 19:09
A Asociación Galega de Escolas Infantís (Agadei) rexeita a "decisión de ter que abrir" as súas instalacións na Fase 2 da desescalada exposta polo Goberno central.
A xuízo desta asociación resulta "precipitado e leva un risco importante para as nenas, os nenos, as súas familias e o persoal das escolas infantís", manifestou este domingo nun comunicado.
Este tipo de centros cren que "as medidas de distanciamento social" serán difíciles de manter e pregúntanse "como van seguir facendo o seu traballo" que "non só se trata de cubrir necesidades fisiológicas básicas, senón de dar agarimo cun bico, consolar cun abrazo ou acougar cunha caricia".
Ademais, non queren verse na tesitura de "discriminar e diferenciar" aos menores que "poden asistir e aos que non", xa que defenden "unha educación e atención igualitaria coas mesmas garantías de seguridade e asistencia educativa", tal e como aseguran que se representa nos seus proxectos educativos.
Apostan por retomar a actividade unha vez entrouse na 'Nova Normalidade', cando "os contagios sexan menores e a volta máis segura", o demais o ven "perigoso e inviable".
Insistiron tamén en que a súa prioridade é a da saúde "fronte á economía" e xa que foron "os primeiro en pechar", cren que "é lóxico que sexan os últimos en abrir".
