Ata dúas persoas poderán desprazarse para traballar as leiras de autoconsumo
A necesidade de desprazamento deberá realizarse nunha declaración responsable que se deberá levar enriba.
Por Europa Press / Redacción | SANTIAGO DE COMPOSTELA | 05/05/2020 | Actualizada ás 13:02
Un total de dúas persoas poderán desprazarse dentro do municipio no que residan ou a outro adxacente para realizar labores en leiras de autoconsumo se así se necesita polo tipo de cultivos e traballados a realizar.
Así o detallou a Consellería do Medio Rural, que informou de que o Diario Oficial de Galicia (DOG) publica este martes unha orde para coordinar as cuestións relativas aos desprazamentos de agricultores non profesionais de acordo coa norma do 30 de abril do Ministerio de Sanidade.
En concreto, segundo o publicado polo ministerio, os traballos realizaranse de forma individual, salvo que se acompañe a persoas con discapacidade, menores, maiores ou por outra causa xustificada. Con todo, será sempre por un tempo indispensable e debendo en todo momento respectar as distancias de seguridade e demais protocolos de prevención establecidos polas autoridades sanitarias.
Respecto diso, segundo o tipo de cultivo ou labores que se deban levar a cabo, agora a Xunta sinala que se poderán desprazar ata dúas persoas. En todo caso, tamén indica que será polo tempo mínimo e imprescindible, e respectando as distancias de seguridade e demais protocolos de prevención establecidos pola autoridade sanitaria.
A Administración autonómica explica que a necesidade de desprazamento deberá realizarse nunha declaración responsable que se deberá levar enriba. Neste documento, deberanse incluír as leiras nas que levan a cabo os cultivos ou os coidados das viñas, incluíndo a identificación da parcela así como o tipo de cultivos que se realiza. Deste xeito, poderá realizar as oportunas comprobacións, controis e inspeccións para verificar o contido.
O departamento autonómico precisou que se poderán seguir efectuando desprazamentos para a realización dos traballos necesarios de atención e de mantemento dos cultivos e os viñedos. Ademais, poderán acreditar a súa condición de profesionais coa súa inscrición no Rexistro de Explotacións Agrarias de Galicia (Reaga).
