O presidente de Abanca di que o Goberno debe ter "en conta" a opinión do sector privado
Juan Carlos Escotet recoñece que estamos diante dunha "situación absolutamente inédita", que "non ten precedentes recentes que permitise ter un manual de actuación moitísimo máis acabado e con mellores resultados".
Por Europa Press / Redacción | SANTIAGO DE COMPOSTELA | 05/05/2020 | Actualizada ás 13:52
O presidente de Abanca, Juan Carlos Escotet, bota "de menos" que o Goberno teña "en conta" a "opinión" do sector privado para as medidas a tomar de face á recuperación económica ante a crise do coronavirus.
"Si botamos de menos a necesaria concertación para que se poidan tomar decisións coa maior celeridade, dado que o tempo é ouro, e cada día que teñamos que permanecer en confinamento suporá unha deterioración económica maior", avisou Escotet a preguntas dos medios este martes na presentación por videconferencia de resultados da entidade do primeiro trimestre.
Considera como "fundamental" e "indispensable" que no conxunto de medidas para a recuperación económica e o control de danos polos efectos da COVID-19 haxa unha "absoluta concertación co sector privado", "tomando en conta opinións de especialistas", posto que cada sector ten "as súas propias realidades".
Escotet defende que o Goberno terá "mellor capacidade de discernir" e as decisións "serán máis axustadas e máis próximas a ter éxito na medida que se tome en conta a opinión de todo o sector privado".
Con todo, admite que "é unha situación absolutamente inédita", que "non ten precedentes recentes que permitise ter un manual de actuación moitísimo máis acabado e con mellores resultados".
"Non creo que sexa responsabilidade exclusiva do Goberno o que todo vaia por mellor camiño", reflexiona o responsable de Abanca, senón que cre que hai "unha responsabilidade individual na aceptación e cumprimento de todas as recomendacións no proceso de levantamento do confinamento", "tendo sempre en conta ao próximo".
