Sanxenxo dividirá a Praia de Silgar en 780 cuadrículas delimitadas por estacas

O alcalde de Sanxenxo, Telmo Martín, presentou un plan de ordenación da praia de Silgar en 780 cuadrículas para "garantir a máxima seguridade sanitaria" e respectar as distancias que recomendan os expertos en aras de previr a propagación do coronavirus.

A solución proposta polo goberno local dun dos concellos máis turísticos de Galicia consiste en dividir a praia en cinco sectores que contasen con persoal para facilitar aos usuarios a súa localización.

A praia de Silgar terá así 780 cuadrículas para un aforamento que pode oscilar entre as 1.560 e as 2.340 persoas, o que significa entre un 50 e un 75% do aforamento respecto de veráns anteriores.

Cada sector terá unha cor diferente e estará formado por centos de cuadrículas de 9 metros cadrados (tres por tres metros), "que en función do número de persoas se poderán ampliar" mediante a agregación de ata catro cuadrículas máis, explicou o alcalde. As cuadrículas estarán delimitadas por estacas de madeira cravadas na area e unidas entre si por unhas cordas.

A nova ordenación da praia reserva dúas franxas lonxitudinais para albergar usos e servizos. Así, disporase dunha franxa entre o mar e a primeira liña de cuadrículas que será unha zona de paseo e xogos para nenos. Terá un mínimo de sete metros de ancho na pleamar, superando os 30 metros coa marea baixa.

Na zona traseira, entre a última liña de cuadrículas e o muro do Paseo de Silgar, resérvase unha franxa de oito metros para distintos servizos como baños, módulo de salvamento e zona recreativa.

A praia disporá de catro accesos perpendiculares de seis metros de ancho que irán desde o muro ata a primeira liña de praia. Cada dúas liñas de cuadrículas haberá corredores paralelos de 3 metros de ancho para facilitar a entrada e saída de bañistas. Cada cuadrícula separarase das contiguas por un espazo de 1,5 metros polo que en ningún caso poderase transitar.

Praia de Silgar, en Sanxenxo | Fonte: Minube