Por Europa Press / Redacción | A CORUÑA | 07/05/2020 | Actualizada ás 11:30
O Goberno procedeu ao pago de 238.395.596 euros a 272.749 persoas afectadas por un expediente de regulación temporal de emprego (ERTE) en Galicia, segundo informa a Delegación do Goberno.
En total, ata o 30 abril, son 272.749 as persoas que percibirán unha prestación na comunidade autónoma galega, das que 182.401 foron recoñecidas en abril, mentres que o resto corresponden á segunda metade de marzo.
O importe total da nómina das 42.256 solicitudes colectivas de ERTE na Comunidade é de 238.305.596 euros, dos cales 100,6 millóns corresponden á provincia da Coruña, 88 á de Pontevedra, 26 á de Ourense e 23,7 á de Lugo.
MANTER O EMPREGO
Tamén remarca que nos ERTE vinculados á COVID-19 "as persoas afectadas por estes expedientes de regulación temporal de emprego suspenden a súa actividade e perciben unha prestación estatal ata que poidan recuperala" e lembra que a normativa do Goberno establece "a obrigación de manter os postos de traballo".
En concreto, engade que as empresas que recorresen a un ERTE por forza maior por causa da COVID-19, se a partir deste luns retoman parte da súa actividade, poderán sacar do ERTE, "mesmo a tempo parcial, ao persoal que necesiten".
"Isto facilitará a situación a moitos pequenos e medianos empresarios e a incorporación de miles de traballadores ao seu posto de traballo", sostén o delegado do Goberno, Javier Losada. Por outra banda, o delegado do Goberno felicitou ao persoal do Servizo Público Estatal de Emprego (SEPE) "pola eficacia demostrada para axilizar os pagos".
XUNTA
Por outra banda, a Xunta ten pendentes de tramitar máis de 1.400 Expedientes de Regulación Temporal de Emprego (ERTE), tras resolver o 96% dos 35.902 presentados, que afectan a 233.830 traballadores.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.