A Delegación do Goberno rectifica e dá luz verde aos mercados agrícolas

A Delegación do Goberno en Galicia informou este venres de que, finalmente, os mercados agrícolas de alimentos e produtos de primeira necesidade poderán celebrarse, despois de que esta semana denagase a apertura destas feiras de proximidade nalgúns municipios a pesar de ter o permiso da Xunta.

Nunha comunicación por redes sociais, a Delegación do Goberno sostén que, "tras consultar coa Avogacía do Estado", poderanse levar a cabo estes mercados de alimentos "respectando as medidas de seguridade sanitaria".

Respecto diso, o conselleiro de Medio Rural, José González, tamén a través da súa conta de Twitter, agradeceu a "rectificación" da Delegación do Goberno e o seu "cambio de criterio".

O conselleiro explica que o xoves contactou co ministro de Agricultura, Luís Planas, para pedir a súa "mediación" ante a Delegación en Galicia, polo que lle agradece o seu papel para conseguir a reapertura de mercados "en beneficio do sector agrario".

Nos últimos días, concellos como o de Carballo queixáronse de que a Subdelegación do Goberno comunicara a prohibición do mercado pouco antes da súa celebración, a pesar de contar co visto e prace da Xunta. Con todo, si que chegaron a abrirse algúns, aínda que con baixa afluencia e poucos postos, en municipios como Ordes, Betanzos e Monforte.

Os sindicatos e organizacións agrarias tamén realizaron críticas á Delegación do Goberno por esta situación. Tanto o Sindicato Labrego como Fruga piden a dimisión do delegado do Goberno en Galicia, Javier Losada, mentres o secretario xeral de Unións Agrarias, Roberto García, censurou "o exceso de celo" para vetar mercados que se permiten noutras comunidades.