UU.AA. denuncia a suba de prezos ao consumidor en paralelo a unha baixada "significativa" do que pagan ao produtor
O secretario xeral de UUAA, Roberto García, denuncia que aínda non se abonaron a "inmensa maioría" dos plans de mellora e incorporación de mozos correspondentes á Política Agrícola Común (PAC) de 2019.
Por Europa Press / Redacción | SANTIAGO DE COMPOSTELA | 13/05/2020 | Actualizada ás 14:45
O secretario xeral de Unións Agrarias, Roberto García, denuncia unha baixada "significativa" do que se paga en orixe no campo galego aos produtores durante o estado de alarma, fronte á subida de prezos que afronta o consumidor.
En rolda de prensa telemática, García sinalou que esta problemática carrexa perdas millonarias para o conxunto de explotacións galegas, á vez que lamenta que o sector agrario sexa o "gran esquecido" en apoios por parte das administracións, a pesar do seu traballo esencial ante o impacto do coronavirus.
Así, denuncia que aínda non se abonaron a "inmensa maioría" dos plans de mellora e incorporación de mozos correspondentes á Política Agrícola Común (PAC) de 2019. Tamén sinala que o "estancamento" lexislativo provoca que quedasen paralizadas medidas para mellorar a mobilidade de terras e garantir os custos de produción.
Tamén censura que as axudas da Xunta por danos de fauna salvaxe para este ano serán de pouco máis de dous millóns, cando se prevén perdas por uns 18 millóns, polo que cifra nun 88% a cantidade de prexuízos que non se restituirán.
De tal forma, Unións Agrarias reclama "corrixir" esa "descompensación" entre o que leva o intermediario e o que recibe o agricultor. Require que se reparta de forma "transparente e xusta" o prezo que pagan consumidores, pois actualmente non se cobren "nin custos" de produción.
PROBLEMÁTICAS POR SECTORES
Na súa intervención, o líder de Unións Agrarias fixo un balance por sectores. No lácteo sinala diferentes circunstancias que levan o prezo á baixa. Desde que comezou a crise do coronavirus, as explotacións galegas cobran "860 euros menos" ao mes, o que coloca ás granxas "nunha situación difícil" de competitividade co resto do Estado.
O litro de leite que se abona a produtores galegos está un céntimo e medio por baixo do que se paga en España --dous céntimos e medio menos que na UE--. De tal forma, alerta de que as máis de 7.000 explotacións lácteas recibirán uns 4 millóns de euros menos ao mes que o resto de granxas españolas.
Aquí, denuncia o 'dumping' que supón a entrada de leite doutros países da UE para venda a perdas, sen ter constancia de "ningún tipo de actuación da Consellería de Medio Rural nin do Ministerio de Agricultura.
Isto únese a que compañías pretenden "impor" prezos nos últimos días que "incumpren toda a normativa vixente". De feito, apuntou a que unha compañía chegou a ofrecer 23 céntimos por litros, sen cubrir custos de produción, aínda que Unións Agrarias mediou para que se suba ese prezo. Por outra banda, as perdas nas 9.800 explotacións de carne son de 2,9 millóns ao mes, o que supón que cada unha ingresa 296 euros menos pola caída de prezos de becerros e vacas.
En ovino e caprino, cifra nuns 700.000 euros as perdas mensuais, mentres que tacha de "case un insulto" as axudas que propón o Ministerio, que "non cobren nin o custo de tramitación". Ademais, as granxas avícolas prevén caídas de ingresos de 3,5 millóns de euros en 2020.
No tocante ao sector vitivinícola, remarca que a caída de vendas da restauración afecta a ao redor do 50% da produción, o que se suma á crise do Brexit e os aranceis de Estados Unidos. Por iso, a tres meses da vendima non só non está garantido cubrir custos de produción, senón tampouco a propia recollida de uvas.
Respecto da pataca, Unións Agrarias detecta que na zona produtora da Limia fanse ofertas por cinco ou seis céntimos, cando os custos de produción están entre 10 e 12 céntimos, aproveitando a situación de que hai máis de tres millóns de toneladas de tubérculos pendentes de dar saída.
Todo iso, mentres os habitantes do rural galego sofren o "agravio comparativo" respecto dos servizos que gozan residentes en zonas urbanas, nunha problemática que se acentúa co estado de alarma. Aquí, Roberto García quéixase da falta de servizos públicos no rural, co "desmantelamento" da asistencia técnica a gandeiros e agricultores, unido á fenda dixital. De tal forma, urxe a que "son necesarias solucións xa", mentres insiste na súa petición de reprogramar 550 millóns de euros de fondos europeos non gastados.
