O Goberno asigna case 43 millóns a Galicia do fondo para compensar parte do exceso de déficit de 2019
Son 4.152 millóns para as comunidades.
Por E.P. | SANTIAGO DE COMPOSTELA | 14/05/2020 | Actualizada ás 18:41
A Comisión Delegada do Goberno para Asuntos Económicos (CDGAE), acordou este xoves asignar ás autonomías un total de 4.152 millóns de euros --43 de millóns deles para Galicia-- con cargo ao Fondo de Financiamento ás Comunidades Autónomas para cubrir parte da desviación do obxectivo de déficit de 2019 no que incorreron varias.
En concreto, destínanse 2.165,25 millóns de euros ao denominado Extra FLA (Fondo de Liquidez Autonómica) e outros 1.986,75 millóns de euros á Extra Facilidade Financeira. Este acordo axuda a que as Comunidades Autónomas afectadas poidan cumprir cos prazos de pago aos provedores, así como garantir que atenden de forma inmediata os seus vencementos de débeda e as súas necesidades de financiamento do déficit público.
Este acordo prevé que se financie o 75% do importe do déficit de 2019 pendente de financiar. O resto da desviación asignarase a partir de outubro, cando se coñezan os datos definitivos do exercicio pasado. Estímase que o total ascenderá a 5.536,36 millóns de euros.
Por Comunidades Autónomas, Aragón recibirá 243,75 millóns; Asturias, 55,5 millóns; Baleares, 81 millóns; Cantabria, 90,75; Castela-A Mancha, 243,75 millóns; Castela e León, 231 millóns; Cataluña, 819 millóns; Estremadura, 156,75 millóns; Galicia, 42,75 millóns; A Rioxa, 22,5 millóns; Andalucía, 210 millóns; Murcia, 396 millóns; e a Comunidade Valenciana, 1.559,25 millóns de euros. A dotación a estas tres últimas comunidades procede do FLA e os anteriores, ao Fondo de Facilidade Financeira.
Tras esta repartición, a distribución de ambos os fondos correspondentes aos dous primeiros trimestres do ano ascende en total a 23.322 millóns, un terzo do total, para Cataluña: 6.989,65 millóns (29,967%).
Ademais, a aprobación destes recursos realízase nunhas condicións financeiras favorables que permiten reducir os custos. A parte destes recursos correspondentes a cubrir o déficit xerado polo cambio normativo do IVE en 2017 financiarase sen intereses (tipo 0). O tipo aplicable ao resto de disposicións será o de interese fixo igual ao rendemento medio da Débeda do Estado a prazo equivalente establecido para o segundo trimestre de 2020.
Esta inxección de liquidez para as CCAA únese aos recursos do sistema de financiamento, que se incrementan un 7,3% este ano ata alcanzar a cifra de 115.887 millóns de euros. Ademais, as comunidades puideron solicitar o anticipo do 50% da liquidación de 2018, que podería ascender a 5.500 millóns e que en condicións normais non se cobraría ata xullo.
O Goberno tamén anunciou a creación extraordinaria dun fondo non reembolsable de 16.000 millóns de euros, independente do sistema de financiamento, para que as CCAA poidan facer fronte aos custos sanitarios, económicos e sociais da pandemia sen incorrer en máis déficit nin débeda, xa que eses gastos serán asumidos directamente polo Estado.
