En Marea impulsará unha plataforma "galeguista" para presentarse ás eleccións
A formación di que a semana pasada celebráronse asembleas de En Marea con "éxito" e abordouse esta posibilidade de "retomar a iniciativa de crear unha plataforma galeguista".
Por Europa Press / Redacción | SANTIAGO DE COMPOSTELA | 14/05/2020 | Actualizada ás 20:45
En Marea está disposta a presentarse a unhas supostos eleccións en xullo. Así o manifestou este grupo logo da xuntanza que o presidente da Xunta, Alberto Núñez Feijóo, mantivo cos principais grupos da oposición para analizar a data electoral que, o líder do PPdeG, quere poñer en xullo.
O membro da dirección Pancho Casal, que se mostrou seguro ao "99%" de que o presidente da Xunta, Alberto Núñez Feijóo optará polo 12 de xullo e, a preguntas dos xornalistas, sinalou que En Marea baralla impulsar de novo unha plataforma "galeguista" para presentarse ás eleccións, despois de que "por xenerosidade" decidisen non facelo o pasado mes de febreiro.
A preguntas dos xornalistas, sobre se En Marea vai reconsiderar a súa postura sobre presentarse ás eleccións autonómicas --o seu líder no Parlamento, o maxistrado Luís Villares retirouse da vida política, segundo anunciou--, Pancho Casal manifestou que "cambiou o país e o mundo" desde que En Marea adoptou aquela decisión e agora abriu unha "reflexión".
"Xogámonos que outra Galicia é posible", dixo, tras o que engadiu que, precisamente, a semana pasada, celebráronse asembleas de En Marea con "éxito" e abordouse esta posibilidade de "retomar a iniciativa de crear unha plataforma galeguista" con "garantías para enfrontarse ao goberno do PP".
Pancho Casal sinalou que "a situación política é diferente agora" e detectou que estes dous meses "a oposición desapareceu", polo que considera que "unha gran plataforma galeguista é unha boa idea que van tentar traballar".
