A Deputación de Pontevedra pon en marcha unha campaña de promoción do comercio local

A presidenta da Deputación de Pontevedra, Carmela Silva, presentou este venres unha campaña de promoción do comercio local da provincia que se desenvolverá por comarcas para tratar de paliar as consecuencias da crise pola COVID-19.

Despois do "grande impacto", dixo, que tivo a promoción dos produtos locais feita pola administración provincial, Carmela Silva anunciou unha "segunda fase de promoción" que está dirixida ao sector comercial e que mantén o lema 'Pontevedra provincia na túa cesta', pero engade o slogan 'Elixe comercio local'.

Segundo explicou este venres a mandataria provincial, esta campaña pretende apoiar a estes pequenos empresarios ao considerar que son "fundamentais para revitalizar a economía do territorio".

Para iso vaise "incentivar o consumo da poboación" neste tipo de negocios, destacando as "vantaxes e singularidades", manifestou, que estes ofrecen fronte a outros "grandes competidores" como son a venda por Internet e os grandes distribuidores.

Esas "características propias" que fan que o comercio local sexa "máis atractivo" pasan por "unha atención máis singular, amabilidade, familiaridade, coñecemento do barrio e a súa clientela, identidade co territorio, sustentabilidade e calidade", enumerou a presidenta.

"DOBRE OBXECTIVO"

Carmela Silva informou que a próxima semana a Deputación empezará con esta campaña que ten un "dobre obxectivo", o xa citado de multiplicar o consumo interior pero tamén se persegue "decantar visitantes".

A campaña centrarase nas comarcas. Como exemplo citou a mensaxe 'Somos unha terra única, merca na comarca de Pontevedra'. E en todas, cun mapa e unha imaxe do territorio correspondente. Desenvolverase a partir do 21 de maio nos medios propios da Deputación, ademais de xornais impresos, dixitais, radios e televisións.

CONCURSO DE FOTOGRAFÍA

Xunto a esta promoción a administración provincial lanza un concurso de fotografía de Turismo Rías Baixas que leva como lema '#ComemosPolosOllos'.

Segundo explicou, ten como obxectivo que a cidadanía "mostre o mellor da nosa provincia" en Twitter e Instagram con "produtos gastronómicos que representen ás nosas comarcas", concluíu.