Por Europa Press / Redacción | SANTIAGO DE COMPOSTELA | 16/05/2020 | Actualizada ás 12:29
O Servizo Galego de Saúde (Sergas) anunciou a contratación de 11 novos técnicos e a posta en marcha dunha plataforma tecnolóxica de seguimento para rastrexar os contactos de persoas infectadas por COVID-19. Uns rastreadores que xa comezaron a funcionar noutras autonomías e son fundamentais para saber a evolución e circulación da pandemia.
Así o explicaron a Europa Press fontes da Consellería de Sanidade, que indicaron que o establecemento do sistema actual, con todas estas actividades centralizadas "incide de forma positiva á hora de coordinar e xestionar dunha forma máis efectiva a pandemia".
"Entre as vantaxes da centralización estarían a garantía de que se utiliza un protocolo único, unha mellor atención ás incidencias que se poidan producir, unha maior axilidade para obter a información de forma diaria e un maior control de todo este proceso", subliñaron.
Ata o de agora, Sanidade utilizaba para o rastrexo de contactos de persoas infectadas por COVID-19 a plataforma xa existente, posta en marcha o pasado luns 11 de maio, "que asumiu a atención do teléfono gratuíto 900 400 116 para dar resposta á gran demanda de información sobre o coronavirus ao comezo da pandemia".
As mesmas fontes de Sanidade detallaron que os protocolos de actuación, así como os circuítos da información e o manexo de incidencias, desenvolvéronse por parte da Dirección Xeral de Saúde Pública "en estreita colaboración" coa Dirección Xeral de Asistencia Sanitaria, xa que a actuación da plataforma de rastrexo "debe estar intimamente ligada ás actuacións asistenciais particularmente con Atención Primaria e servizos de Medicina Preventiva, entre outros", abundaron.
Ademais da plataforma, participan no rastrexo os servizos de Medicina Preventiao e os técnicos de vixilancia epidemiolóxica das Xefaturas Territoriais de Sanidade e de Servizos Centrais da Consellería.
ENQUISA
Sobre o funcionamento, Sanidade indicou que o rastrexo iníciase cunha enquisa epidemiolóxica vía telefónica a todos os casos confirmados por COVID-19. Nela, o paciente, notificará os datos das persoas coas que mantivo contacto estreito, desde dous días antes do comezo dos síntomas ata o momento do seu illamento.
Estes contactos son seguidos diariamente para detectar a presenza de síntomas compatibles con infección por COVID-19, momento en que se derivan ao seu médico de Atención Primaria para a súa valoración e solicitude de PCR se así se estima. En caso de confirmación da infección desencadéase de novo o rastrexo dos seus contactos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.