A Xunta non sabe cando abrir as garderías e critica ao Goberno central por non regulalo

O presidente da Xunta non sabe como, nin cando abrirán as garderías en Galicia logo de que o Goberno central deixara en mans das autonomías a súa regulación. Unha liberdade de competencias que non lle gustou nada a Feijóo que a pesar de criticar a maior parte dos protocolos de Madrid, tamén quería que fora o Executivo de Pedro Sánchez quen decidira tamén que facer na apertura de escolas e garderías.

Preguntado este domingo acerca de cando reabrirán as escolas infantís de cero a tres anos, Feijóo apuntou a que "non hai unanimidade" entre a Sociedade Española de Pediatría, aínda que os profesionais do comité da Consellería de Sanidade están "a favor" se "os pais queren levar aos seus nenos" aos centros.

Así, deslizou que a Xunta "asumirá a súa responsabilidade" e valorará ao longo desta semana abrir as gardarías tras consultar tanto á Pediatría galega como á española.

Non en balde, Feijóo criticou que o Goberno central "non quere falar" nin regular as cuestións do ámbito educativo. "Estamos a falar de se unha persoa pode ir pescar dun concello a outro e se pode traspasar facendo ciclismo un termo municipal (...). Todo isto está regulado polo Goberno de forma estrita, pero con todo a volta ás aulas non se regula".