As exportacións galegas afúndense un 26,7% en marzo, a maior caída de toda España

A irrupción do coronavirus rompe coa alza que sumaban as vendas ao exterior de xaneiro e febreiro, con especial incidencia no téxtil.

Por Europa Press / Redacción | Vigo | 19/05/2020 | Actualizada ás 11:50

Comparte esta noticia

Galicia realizou exportacións en marzo por valor de 1.357 millóns de euros, o que supón un afundimento do 26,7% respecto ao mesmo mes de 2019 debido ao impacto do coronavirus, segundo os datos que publica este martes o Instituto Galego de Estatística (IGE).

Esta caída é a maior de entre todas as comunidades, máis de 10 puntos superior á media española de retroceso (-14,4%). A Galicia séguelle Cantabria (-24,9%) e Navarra (-23%). Antes da irrupción do coronavirus as exportacións galegas crecían un 8% entre xaneiro e febreiro, pero marzo rompe con esa tendencia. De tal forma, no acumulado do primeiro trimestre prodúcese así unha baixada 4,5%, tamén máis acusada que no resto do país (-3%).

O esborralle do mes de marzo está protagonizado en Galicia polo desmoronamento do 52% das vendas ao exterior de pezas de vestir, nun contexto de estado de alarma que carrexou a paralización de negocios non esenciais. A máis distancia atópanse combustibles (-3,7%) e material eléctrico (-3,1%). En cambio, a demanda de conserva durante o confinamento fixo que repuntasen as súas exportacións.

No acumulado dos tres primeiros meses, as vendas ao exterior de pezas de vestir tamén están á cabeza do descenso (-4,6%). En cambio, as vendas de automóbiles van á alza debido ao bo comportamento de xaneiro e febreiro (+3,7%). Por destino, en marzo caeron un 22,6% as exportacións galegas á UE, incluídos os principais países cos que comercia Galicia como son Francia (-20,3%) e Portugal (-19,1%). Fóra da UE tamén hai un descenso de forma xeneralizada, especialmente a Reino Unido.

As IMPORTACIÓNS TAMÉN BAIXAN

Pola súa banda, Galicia importou bens por 1.359 millóns de euros en marzo --o que arroxa un saldo negativo duns dous millóns coas exportacións--, cunha baixada da 16,1% fronte ao terceiro mes de 2019. Esta diminución é máis elevada que a computada en España (-14,4%).

No primeiro trimestre, as importacións descenderon en Galicia un 7,6%, de novo un dato máis avultado que o que se observa no Estado (-4,9%). Combustibles (-7,6%) e automóbiles (-4%) son os que presentan os peores datos en importacións en marzo en Galicia, mentres soben as pezas de vestir. Uns comportamentos que se reproducen de forma similar no primeiros tres meses de 2020.

Exportacións. EUROPA PRESS - Archivo
Exportacións. EUROPA PRESS - Archivo

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta