Estrella Galicia aproveita a pandemia para sacar unha cervexa especial

Hijos de Rivera, a empresa propietaria de Estrella Galicia, aproveita a pandemia para sacara nos vindeiros días unha cervexa especial. Será, di, en agradecemento a todos aqueles que estiveron en primeira liña na loita contra a pandemia e baixo o lema: '1 millón de grazas, 1 millón de botellas'.

Por outra banda, a Federación Española de Bancos de Alimentos e Hijos de Rivera pecharon un convenio de colaboración a nivel nacional polo que a compañía galega comprométese "a apoiar activamente o labor fundamental que está a levar a cabo esta entidade ao longo do período dun ano", informa a compañía.

Dito acordo recolle, segundo explica, "un amplo abanico de accións que van desde achegas de fondos e de produtos ao apoio na difusión de campañas e eventos de sensibilización e recadación".

Ademais, a compañía comprometeuse "a seguir contribuíndo ao aprovisionamento de bebidas da entidade a través dos seus produtos durante o próximo ano, dando continuidade e ampliando así uns envíos que xa levaba realizando de forma regular nos últimos anos".

Tamén haberá unha doazón de 400.000 euros á Federación Española de Bancos de Alimentos para apoiar os seus proxectos máis urxentes, en especial os destinados a combater a emerxencia social que levou por centos de miles de familias á precariedade.