Por E.P. | SANTIAGO DE COMPOSTELA | 20/05/2020 | Actualizada ás 12:53
Esquerda Unida criticou a "decisión unilateral" do presidente da Xunta, Alberto Núñez Feijóo, de convocar eleccións autonómicas para o próximo 12 de xullo e pediu que se garantan os dereitos democráticos de todos os galegos que residen no exterior.
Nun comunicado remitido aos medios, a formación asegura que desde a reforma electoral de 2011, coa implantación do voto rogado, demostrouse "convocatoria tras convocatoria" que este sistema de petición "limita e priva de dereitos democráticos ás persoas residentes ausentes que están esparexidas por todo o mundo e que en Galicia representan máis dun 17% do censo total".
"Nunha situación marcada pola pandemia da COVID-19, onde o confinamento da poboación é unha medida de prevención mundial, e onde cada país tivo unha incidencia de infección diferente, preguntámonos que garantías ten previstas Feijóo para garantir que ese medio millón de persoas emigradas en Galicia poida exercer o seu dereito ao voto", sinala a coordinadora nacional de Esquerda Unida, Eva Solla.
Esquerda Unida considera que o presidente da Xunta tomou unha decisión de convocar as eleccións por "intereses partidistas sen ter en conta a situación dos galegos e sen importarlle a situación dos residentes ausentes para poder acceder ao voto".
Por iso, preguntouse como vai garantir Feijóo o acceso dos galegos aos consultados. Así, puxo como exemplo o caso de Brasil, que ten unha porcentaxe elevada de contaxios e supón o segundo país con máis residentes galegos despois de Arxentina. "Como se van a desprazar os votantes aos seus consulados para rogar o voto cando nin tan sequera poden saír das súas casas?", cuestionou Eva Solla.
Ante estas cuestións, a formación instou á Xunta a "actuar en consecuencia" e habilitar os medios necesarios para garantir o dereito ao voto de todos os galegos inscritos no Censo de Residentes Ausentes (CERA).
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.