Epidemiólogos propoñen que se teña en conta o criterio da idade para a conformación das mesas electorais

O profesor emérito de Medicina Preventivo e Saúde Pública Juan Jesús Gestal Otero é partidario de "simplificar e promover" o voto por correo, así como reforzar coas máximas medidas de seguridade os colexios electorais, co fin de reducir calquera risco de rebrote na cita electoral do próximo domingo 12 de xullo.

Segundo trasladou a Europa Press, entre as medidas que, ao seu xuízo, serían positivas para reforzar a seguridade sanitaria, está que os votantes acudan aos colexios electorais con máscara, evitar aglomeracións e manter "sempre" a distancia de seguridade de 2 metros. De feito, propón "sinalizala nas colas".

Na liña cos consellos que, de forma xenérica, dan as autoridades para combater o coronavirus, mostrouse partidario de dispor de frascos con solución desinfectante nas mesas nas que estean as papeletas e sobres, para que sexa sinxelo desinfectarse as mans. Tamén defende que sexan os votantes quen introduzan directamente o sobre na urna.

Pero non só ve clave preservar a distancia de seguridade entre os votantes, senón tamén por parte dos seleccionados para formar parte das mesas electorais. Para protexer a súa saúde, asegurou que sería positivo, así mesmo, utilizar máscaras e pantallas. Todo iso, ademais de insistir nas solucións desinfectantes.

"MÁIS FÁCIL" APLICAR O CRITERIO DE IDADE QUE O DE PATOLOXÍAS

Preguntado acerca de se cre que sería conveniente que cidadáns con patoloxías sexa excluídos das mesas electorais, apuntou que parece "complicado" abordar este asunto desde a perspectiva das enfermidades, aínda que si entende que sería "máis fácil" aplicar o criterio da idade.

En todo caso, dá por feito que calquera que teña unha doenza de risco presentará unha alegación en caso de selección para formar parte dunha mesa.

VOTAR POR CORREO: "MOI RECOMENDABLE PARA TODO O MUNDO"

Ao seu modo de ver, o previsible é que para a cita do 12 de xullo "aumente" o voto por correo, do que se mostrou como un gran defensor.

"Ten que ser simplificado. Desde logo, considéroo moi recomendable para todo o mundo, e por suposto para as persoas maiores e sobre todo para aquelas con patoloxías de risco.

Unha veciña vota na mesa electoral do Perdouro, en Burela | Fonte: Europa Press

CIRCULACIÓN MÍNIMA DO VIRUS PARA AS ELECCIÓNS

O responsable do director xeral de Asistencia Sanitaria do Sergas, Jorge Aboal Viñas, afirmou que a "circulación do virus vai ser mínima" durante o período elixido para celebrar as eleccións galegas, que terán lugar finalmente o 12 de xullo tras ser aprazadas a finais de marzo pola crise do coronavirus.

A preguntas dos medios durante a rolda de prensa telemática na que foi presentado o estudo de seroprevelancia do Covid-19 na Comunidade galega, Jorge Aboal incidiu en que "desde o punto de vista epidemiolóxico e sanitario" a primeira quincena de xullo "vai ser o período máis seguro" para celebrar uns comicios.

Así, fixo referencia aos estudos sanitarios elaborados por técnicos da Xunta que apuntan ao comezo do verán como o mellor momento para emprazar as eleccións.

Un período no que, segundo Aboal, "se todo transcorre como está a ir" e funcionan os "sistemas de seguridade", a circulación do coronavirus na comunidade "vai ser mínima".

A continuación, lembrou que a Consellería de Sanidade traballa na elaboración dun procotolo orientado a "aumentar a seguridade e as garantías sanitarias" para que "todo o mundo poida votar".