Desmantelados dous grandes viveiros artificiais de marihuana en chalés de Teo

A Policía Nacional detivo dous homes de nacionalidade española de 41 e 68 anos como presuntos responsables de senllos delitos de tráfico de drogas e defraudación do fluído eléctrico, no marco dun operativo no que desmantelou dous viveiros artificiais para o cultivo de marihuana en Teo.

Segundo informou a Policía Nacional, a denominada 'Operación Green' é o resultado dunha "intensa investigación, dirixida a desmantelar importantes plantacións destinadas ao cultivo de marihuana de interior", desde as que, matizou, "se abastecía" tanto á cidade de Santiago como ás súas áreas de influencia.

Froito destas investigacións, os axentes localizaron dous chalés situados no municipio de Teo nos que os detidos estableceran dúas plantacións de marihuana e cuxas instalacións "estaban dotadas dos medios máis sofisticados para o filtrado e extracción de gases co fin de evitar ser detectados polas Forzas e Corpos de Seguridade", resaltaron as mesmas fontes.

REXISTROS

Nos rexistros domiciliarios realizados os investigadores comprobaron como cada un contaba con "diferentes salas en función do grao de crecemento das plantas, así como outra destinada ao seu secado", apuntou a Policía.

"A magnitude das instalacións reflíctese nos numerosos efectos intervidos polos axentes, entre os que destacan 90 lámpadas de calor, 10 termostatos de temperatura e humidade, catro filtros catalizadores industriais, 10 extractores de aire industriais, un extractor industrial específico para o pole de cannabis, 36 ventiladores, 49 transformadores, 12 cebadores, dous depósitos de 200 litros cada un con instalación de rega automática e dúas deshumidificadores", concretou a Policía.

Así mesmo, os axentes da comisaría compostelá interviñeron, subliñaron as mesmas fontes, "unha importante cantidade de marihuana", sobre de 16 quilogramos "xa disposta en cogollos listos para o seu embolsado e posterior distribución".

CONFINAMENTO

Os investigadores estiman que a razón pola que "esta importante cantidade de marihuana se atopaba almacenada" ten a súa explicación pola situación de confinamento motivada pola crise da COVID-19, xa que, aclararon, "o habitual é que nestes centros de cultivo se distribúa rapidamente a marihuana colleitada e así dificultar ou evitar a actuación das Forzas e Corpos de Seguridade".

Ademais destes 16 quilogramos, interviñéronse outros catro quilogramos de 'picadura de marihuana', 632 plantas en diferentes fases de crecemento, así como 200 gramos de 'pole de cannabis', ademais de diferentes útiles, tales como balanzas para a pesada, unha envasadora ao baleiro, un computador portátil, unha pistola detonadora e 2.400 euros en efectivo.

A investigación foi realizada por funcionarios adscritos ao Grupo de Estupefacientes da Brigada Local de Policía Xudicial da Comisaría de Santiago de Compostela e os detidos postos a disposición dos Xulgados de Instrución número 1 e 2 de Santiago de Compostela.

Plantación de marihuana. GARDA CIVIL