A Deputación de Pontevedra constitúe a comisión técnica de asesoramento aos concellos

Os tres grupos provinciais con representación na corporación provincial, PSOE, PP e BNG asinaron este venres a constitución oficial dunha comisión técnica na Deputación de Pontevedra, integrada por funcionarios da institución, a través da que asesorar aos concellos sobre as dúbidas e problemáticas que poidan xurdir pola crise da COVID-19.

A presidenta da Deputación de Pontevedra, Carmela Silva, informou sobre esta decisión unánime en rolda de prensa. Pola súa banda o portavoz do PP, Jorge Cubela, agradeceu que o goberno provincial asuma esta petición que expuxo o Partido Popular nas reunións de seguimento da COVID, xa que está convencido de que "vai ser unha ferramenta moi útil para apoiar e asesorar a todos os concellos desta provincia".

Carmela Silva tamén informou de que se van modificar as bases do Plan Concellos, para poder incrementar as porcentaxes que se destinan para a liña 3, destinada ao emprego. Deste xeito, o acordo adoptado é que os concellos poidan incrementar do 22 ao 30% a cantidade que destinan para a contratación de persoal.

XUNTA DE GOBERNO

Este venres tamén se aprobou na Xunta de Goberno da Deputación investimentos de máis de 1,2 millóns de euros do Plan Concellos para Nigrán, Redondela, Mos, Sanxenxo, Soutomaior, Meis e Portas. A maioría serán para obras no patrimonio, saneamento, vías municipais e para emprego.

Tamén se acordou a suspensión dos programas Tecendo Lazos, DepoTermal, DepoEnMarcha, En ruta coa Depo, DepoAventura a Lanzada, DepoDesafío, DepoAndainas, Campamentos polideportivos e Conectadas.

A presidenta da Deputación de Pontevedra, Carmela Silva.. DEPUTACIÓN DE PONTEVEDRA - Arquivo