Feijóo desenténdese do voto da emigración: “iso non é unha competencia da Xunta”

O presidente da Xunta, Alberto Núñez Feijóo, volveu botar balóns fóra ante a posibilidade de que milleiros de galegos non poidan exercer o dereito ao voto este 12 de xullo debido ao impacto que a COVID-19 está tendo en numerosos países, principalmente, en iberoamérica.

papeleta, votación urna, eleccións, Xerais, municipais | Fonte: EP

“Sen dúbida iso non é unha competencia autonómica e non nos corresponde a nós facilitar o voto por correo, senón que lle corresponde a Correos”. Foi a resposta que lle deu o líder do PPdeG ao Galicia Confidencial tras preguntarlle polas críticas dalgúns emigrantes que denuncian que non se tivo en conta a situación de determinados países con forte presenza galega na convocatoria electoral.

Felipe Pousada Prado, Presidente del Fórum Empresarial Hispano-Brasileño do Estado de São Paulo (FEHB-SP) e administrador provisional da Asociación de Empresarios Galegos de São Paulo ( AEGASP) lembraba hai uns días que no Brasil, debido “á catástrofe da xestión de Bolsonaro” fronte ao virus, a situación “é case caótica”. E Brasil é o segundo país con máis galegos do mundo, segundo os datos do INE-Instituto Nacional de Estatística.

Por iso, Feijóo recoñeceu que, efectivamente, “nalgún país pode pasar ese problema de voto”, aínda que tamén lembrou que ese problema para votar tamén se pode rexistrar cando hai “problemas sanitarios ou climatolóxicos”. “É un risco que non se pode evitar”, concluíu.

Actualmente o Censo de Residentes Ausentes (CERA) de Galicia é do 15%, e a gran parte deses votantes están en América, onde hai importantes restricións pola actual situación da COVID-19. O gran electorado galego en América está en Cuba, México, Venezuela, Arxentina, Brasil e Uruguai, algúns deles moi golpeados pola pandemia.