Os galegos cumpriron maioritariamente as normas nas praias na última fin de semana da fase 1
Ditáronse un menor número de multas e advertencias que en datas anteriores.
Por Europa Press / Redacción | Santiago de Compostela | 25/05/2020 | Actualizada ás 19:21
Os galegos despedíronse este pasado fin de semana da fase 1 da desescalada e fixérono entre unha intensa calor que, a pesar da tentación, non causou grandes problemas nos areais, onde apenas se rexistraron multas por saltarse as normas.
A tónica xeral na costa foi o cumprimento das indicacións, e, segundo explicaron fontes municipais e dos corpos de vixilancia, ditáronse un menor número de multas e advertencias que en datas anteriores.
Nesta situación atopáronse tanto Vigo como A Coruña onde, confirmaron, non se impuxo ningunha multa por saltarse as normas da fase 1 da desescalada durante a fin de semana nas praias. Os areais estaban dispoñibles para que os cidadáns paseasen, pero aínda non podían tombarse ao sol nin darse un baño.
Noutros puntos, en particular das Rías Baixas, si se detectaron algúns incumprimentos, aínda que se saldaron soamente con advertencias. Un caso especial foi o da Illa, onde se impuxeron preto de 40 multas a bañistas, algún deles chegado mesmo desde fóra da provincia.
En todo caso, os galegos xa non terán que esperar máis para tombarse na praia ou meterse no mar, xa que a entrada en vigor este luns da fase 2 dálles a posibilidade de realizar estas actividades, aínda que sempre dentro da súa mesma provincia de residencia.
Terán que facelo, como lembran os carteis e paneis informativos instalados en moitas praias, mantendo a distancia de seguridade e en grupos de, como máximo, 15 persoas. Ademais, non poderán utilizar as duchas e deberán cumprir coas indicacións que establezan os concellos.
Este mediodía, o concelleiro pontevedrés Iván Puentes visitaba a praia fluvial do Lérez para comprobar como quedaron os carteis informativos que lembran as normas aos usuarios, onde tamén destacou que, nas primeiras horas de fase dúas cumpríronse "absolutamente" as normas.
Na mesma liña, varios concellos, como o de Oleiros, emitiron comunicados nos que pediron aos usuarios que actúen con responsabilidade e cumpran a normativa, algo que vixiarán nos próximos días, en distintos puntos da comunidade, corpos como a Policía Local ou Protección Civil.
