Por E.P. | A Coruña | 26/05/2020 | Actualizada ás 15:28
O comité de Alu Ibérica da Coruña e a Xunta urxen ao Goberno central a convocatoria dunha mesa de seguimento para "aclarar" a situación tras o anuncio de venda a Grupo Industrial Riesgo desta fábrica e a de Avilés.
Tras un encontro en Santiago co conselleiro de Economía, Francisco Conde, o presidente do comité da Coruña, Juan Carlos López Corbacho, incide na necesidade da "intervención" das plantas, co nomeamento dun xestor pola parte estatal e autonómica para que se garantan os investimentos e o emprego.
López Corbacho cre necesario "fiscalizar ese proceso" e que se reúna a mesa industrial en Madrid, xa que os traballadores están "preocupados" polo seu futuro.
POSTURA DA XUNTA
O conselleiro de Economía, Francisco Conde, instou á nova dirección de Alu Ibérica a presentar canto antes por escrito o seu plan industrial ante todas as partes e nunha mesa convocada polo Goberno, cun compromiso "explícito e con transparencia".
Ademais, sostén que a solución pasa por que o Goberno central asegure un prezo eléctrico competitivo, cun estatuto par as electrointensivas que garanta estabilidade ao sector.
Así, censura a "deslealdade" e "falta de respecto" do Goberno, porque "non dá resposta nin solución á situación das empresas electrointensivas de Galicia, como é o caso de Alu Ibérica ou Alcoa en San Cibrao".
Conde reprocha que o Estado está "a utilizar a transición enerxética como escusa para abandonar a industria e o emprego", co risco para o emprego de 5.000 familias do aluminio en Galicia.
GRUPO RIESGO DENUNCIA "IRREGULARIDADES
Pola súa banda, a nova dirección de Alu Ibérica detectou ao longo da súa curta xestión de mes e medio nas fábricas "numerosas irregularidades por parte dos xestores anteriores nas plantas de Avilés e A Coruña", segundo informou Grupo Industrial Riesgo.
A este respecto, López Corbacho dixo que os traballadores levan tempo denunciando a xestión "desastrosa" por parte de Alcoa sen facilitarlles "documentación" sobre as contas, polo que Grupo Riesgo "non vén descubrir nada novo". "Que fagan o que teñen que facer", afirmou, pero remarca que se debe "investigar" tamén o seu "socio" Parter polo incumprimento de investimentos nestes meses.
Tamén lembra que Grupo Riesgo volve contar co director que tivo a fábrica entre 2010 e 2020, José Gil Fernández-Pulpeiro, cunha "xestión catastrófica", polo que se pregunta "se se van denunciar a eles mesmos".
O comité de empresa de Alu Ibérica da Coruña presentou o pasado venres denuncia ante Inspección de Traballo para que investigue a situación da compañía despois de que Parter anunciase a venda desta antiga planta de Alcoa e a de Avilés a Grupo Industrial Risco.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.