Desestimada unha demanda da CIG para obrigar a realizar tests aos empregados de Ambulancias do Sil

O Xulgado do Social número 3 de Ourense desestimou a demanda presentada pola CIG contra a empresa Ambulancias do Sil, adxudicataria do servizo de transporte sanitario urxente na zona de Valdeorras-Verín-Lemos, na que solicitaba que a empresa realizase ao seu empregados tests de dobre banda mentres dure a pandemia da COVID-19.

A empresa, segundo a sentenza, forneceu aos traballadores máscaras, batas, monos e luvas. E, ademais, realizoulles tests de dobre banda e todos deron negativo.

Aínda que as probas xa foron practicadas, este sindicato solicita que sigan facéndose mentres dure a pandemia, polo que a titular do Xulgado do Social número 3 de Ourense rexeita a existencia de carencia sobrevinda de obxecto para desestimar a demanda.

A xuíza destaca na resolución que non hai "ningunha lesión ou vulneración do dereito á integridade física por non realizar o test de dobre banda, ao non existir ningún tipo de normativa que impoña ás empresas realizalos".

Neste sentido, indica como "única obriga" proporcionar os equipos de protección individual para evitar contaxios. "Neste caso, non foi cuestionado de ningún xeito que non se forneceron eses equipos, sendo significativo que durante máis de dous meses non houbese ningún contaxio, o que evidencia a súa calidade e a súa efectividade", puntualizou.

DETECCIÓN

Os tests, segundo resalta a maxistrada na resolución, son efectivos só ata o día no que se realizan, polo que incide en que non son "un elemento de prevención ou protección, senón de detección".

"A protección obtense a través dun protocolo e uso estrito de equipos de protección individual como se indicou anteriormente", resalta a xuíza, que considera que "os tests han de reservarse, por tanto, a quen presentan síntomas para, aquí si, adoptar a evidente prevención de apartar á persoa contaxiada do servizo, prevención en relación co resto dos traballadores e non coa propia persoa contaxiada".

Así mesmo, apunta que os tests "teñen máis finalidade de xestión da pandemia e diagnóstico dos afectados para procurar o seu tratamento e establecer medidas antipropagación, que de protección, sendo preferente a súa utilización en persoas con síntomas, e conforme sinale as autoridades sanitarias nas últimas recomendacións do Ministerio de Sanidade, os tests solicitados só se indicaban na contorna de investigación e non debía usarse noutra contorna". Por todo iso, desestímase a demanda.