Sanidade ten previsto comezar en xuño a segunda onda do seu estudo epidemiolóxico
"Vai estar nos primeiros días de xuño, na contorna do 11 de xuño, nesa semana seguro que empezamos", asegurou o conselleiro de Sanidade.
Por Europa Press / Redacción | SANTIAGO DE COMPOSTELA | 27/05/2020 | Actualizada ás 14:06
O conselleiro de Sanidade, Jesús Váquez Almuiña, afirmou este mércores que se prevé empezar na segunda semana de xuño a segunda onda do estudo epidemiolóxico do Sergas para analizar a circulación do coronavirus COVID-19 pola Comunidade galega.
"Vai estar nos primeiros días de xuño, na contorna do 11 de xuño, nesa semana seguro que empezamos", asegurou Almuiña, a preguntas dos medios no marco dunha rolda de prensa na que se presentou o protocolo de medidas sanitarias fronte ao coronavirus con motivo das eleccións autonómicas do 12 de xullo.
Sobre o desenvolvemento da segunda onda, comentou que "en 10 días, como na outra fase, acabarase" este estudo epidemiolóxico, cuxa primeira parte levou a cabo entre o 23 de abril e o 8 de maio para analizar a circulación do virus SARS-Cov2 na Comunidade galega, na que o Sergas contactou cunha mostra de 50.925 participantes na mostra, a mesma prevista para a segunda parte
PRIMEIRAS CONCLUSIÓNS
A primeira parte do estudo de seroprevalencia do Sergas ratificou que o coronavirus COVID-19 circulou pouco por Galicia, cunha prevalencia do 1,15 por cento, con Ourense como a provincia con maior porcentaxe, 1,88% (5.609 persoas), e A Coruña co menor, 1,07%. Deste xeito, a Consellería de Sanidade estima que "30.000 galegos están inmunizados", deles 17.000 mulleres e 13.000 homes.
En concreto, Sanidade apuntou nas conclusións tras a primeira onda que a prevalencia do virus entre a poboación galega aumenta conforme se incrementa a idade, polo que sitúa no 0,56% entre os galegos de 0 a 18 anos, con 2.196 inmunes neste tramo; sobe ao 1,09% entre os 19 e 64 anos --17.194 persoas-- e aumenta ao 1,64% --10.959-- entre o colectivo maior de 65 anos.
Por áreas sanitarias, a de maior prevalencia é a de Ourense, co 1,88% (5.609 persoas) e 94 positivos de entre 6.983 probas; seguida da de Vigo, co 1,64% (9.329 persoas), con 94 positivos en 8.063 test e as de Pontevedra e O Salnés, con 1,35% (3.881 persoas) tras 52 positivos en 5.305 probas.
Segundo os datos detallados por áreas, na da Coruña a prevalencia foi a menor do sete e sitúase no 0,62% (3.397 persoas), con 322 positivos de entre 7.142 test; mentres que na de Santiago e Barbanza a circulación foi do 1,02% (4.513 persoas) con 55 positivos en 7.117 probas.
Na de Lugo a prevalencia foi do 0,79% (2.488 persoas), con 45 positivos de entre 7.327 probas; e na de Ferrol sitúase no 0,65% (1.133 persoas) con 13 positivos en 2.895 probas.
