A Xunta insiste en reclamar a mobilidade entre provincias para visitas entre familiares

A Consellería de Sanidade destaca que o Ministerio accede a modificar a orde que calculaba o aforamento das praias a partir dos seis metros.

Por Europa Press / Redacción | Santiago de Compostela | 28/05/2020 | Actualizada ás 14:07

Comparte esta noticia

A Consellería de Sanidade volveu a reclamar ao Ministerio a mobilidade interprovincial no marco da desecalada para facilitar a mobilidade en concellos limítrofes e posibilitar visitas entre familias de ata segundo grao que vivan en provincias distintas en Galicia.

Garda Civil de Tráfico
Garda Civil de Tráfico | Fonte: © Miguel Núñez.

A Xunta explicou que este mércores pasado tivo lugar unha nova reunión bilateral telemática entre Sanidade e o Ministerio para tratar diversos asuntos relacionados coa crise sanitaria da COVID-19, na que o conselleiro Jesús Váquez Almuiña expuxo de novo medidas para flexibilizar as fases da desescalada.

No encontro telemático, os responsables do Ministerio de Sanidade confirmaron ao departamento sanitario galego, destacou a Consellería, que o Goberno modificou a orde sobre o uso das praias ao suprimir a referencia aos seis metros a contar desde a beira en pleamar, polo que "o aforamento calcularase considerando que a superficie da praia a ocupar por cada bañista sexa de aproximadamente catro metros cadrados".

"Tal e como reclamara o conselleiro, o cálculo anterior impediría o uso de moitos dos areais galegos", abundou a Consellería.

Outra das peticións realizadas foi permitir aos estudantes universitarios que se poidan desprazar entre provincias para recoller as pertenzas que deixaron nos seus lugares de estudo coa entrada en vigor do estado de alarma.

O Ministerio tamén accedeu, sinalou Sanidade, "a que en Galicia se poidan retomar as actividades de tanatoestética en cadáveres de persoas que non faleceran por COVID".

Xunto con estes, o titular de Sanidade volveu reiterar a petición da Xunta para que se facilite a mobilidade interprovincial en concellos limítrofes.

Deste xeito, Almuiña expuxo de novo varias alternativas, en concreto, para que se permitan as visitas entre familiares de ata segundo grao que vivan en provincias distintas e dentro de Galicia, así como permitir o desprazamento a outra provincia cando a súa finalidade sexa visitar a un familiar usuario de centros residenciais.

Tamén Almuiña reiterou a petición de que se acceda á mobilidade interprovincial para realizar visitas tuteladas ou supervisadas aos nenos ou adolescentes dos centros de protección e reforma ou para o uso dos Puntos de Encontro Familiar; e respecto das viaxes a segundas residencias, que estean permitidas aínda que estean en diferentes provincias, sempre que se pase a noite nas mesmas.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta
Comentarios 1 comentario

1 Ana

Señores a xente comenza a despertar e a organizarse. ¿No o credes?. Mirade en youtube o video co titulo "Vaias a perder esta guerra contra la libertad"