As diferentes fiscalías territoriais investigan a entrega de máscaras defectuosas por toda Galicia

Todas as fiscalías territoriais galegas manteñen abertas as dilixencias de investigación en relación ás máscaras defectuosas entregadas en diferentes áreas sanitarias galegas a finais do mes de abril e cuxa distribución foi denunciada polo sindicato dos profesionais da sanidade pública galega Prosagap.

Así, aínda que este mércores un informe fiscal recollía as dilixencias abertas en Lugo e Pontevedra, fontes do Ministerio Público confirmaron a Europa Press que todas as fiscalías galegas abriron investigacións para aclarar o sucedido e determinar se puido producirse algún delito.

Este proceso parte do sindicato Prosagap, que denunciou aos responsables das distintas áreas sanitarias galegas pola distribución das máscaras 'Garry Galaxy' contidas en envase verde, un lote de elementos de protección distribuído polo Goberno central e que se comprobou que non cumprían coas esixencias de filtrado.

Tras ter coñecemento desta situación, a Xunta inmobilizou máis de 85.000 unidades, 36.883 na plataforma de distribución de Negreira e outras 45.408 xa nas xerencias sanitarias, onde algunhas foron utilizadas. De feito, no test feitos posteriormente aos traballadores que as empregaron, detectáronse 76 positivos por coronavirus.

A Fiscalía Superior de Galicia recibiu a denuncia presentada polo sindicato médico, e deulle traslado a cada unha das fiscalías territoriais para que analizasen o sucedido na súa área. Como é habitual, estas abriron dilixencias de investigación, aínda que aínda non se produciron novos pasos.

Caixas con máscaras co logo da Xunta