Sánchez asegura que España pode lograr a vacina "antes do esperado"

O presidente do Goberno, Pedro Sánchez, asegurou que os científicos españois "están en condicións de empezar as probas clínicas en breve" da vacina contra o coronavirus, polo que "parece posible" contar con ela "nun prazo máis breve do esperado". "Practicamente á vez que as grandes multinacionais ou antes nalgúns casos", manifestou este domingo Sánchez durante a rolda de prensa posterior á súa reunión cos presidentes autonómicos.

Neste contexto, destacou que España está a participar nun total de dez equipos financiados polo Fondo Covid-19 que "se atopan na fase preclínica de proxectos que buscan a vacina". "Ademais de fondos España achega talento", sentenciou Sánchez, á vez que sinalou que hai equipos españois traballando en desenvolvementos de prototipos e que algúns deles "se sitúan entre os máis avanzados".

Por iso, celebrou que "empeza a parecer posible atopar unha vacina nun prazo máis breve do esperado" e engadiu que avaliaron e están a facer un seguimento activo en "máis de 200 proxectos de investigación".

Entre os máis de 200 proxectos de investigación, o presidente do Executivo resaltou "ensaios clínicos para novos fármacos, test diagnósticos máis rápidos, detección do virus no aire, uso de augas residuais como marcador de novos brotes e outros moitos liderados polo Instituto Carlos III".

"Nunca máis podemos permitirnos que se debilite o noso Sistema Nacional de Saúde, que é a nosa trincheira máis segura", apuntou Sánchez, destacando que a investigación e a ciencia "é pulo e progreso". Neste sentido, subliñou que os investigadores españois "son un orgullo" para o país e lamentou que os máis mozos "son os máis danados desde o punto de vista da educación e o mercado laboral".

"ABSOLUTA TRANSPARENCIA"

Ademais, Pedro Sánchez defendeu a "absoluta transparencia" do Executivo á hora de dar datos sobre a cifra de falecidos por COVID-19 durante a crise sanitaria, e explicou que a modificación realizada nos datos se realizou por "criterios técnicos", aínda que afirmou que a cifra real non se coñecerá ata que se supere a pandemia.

Sánchez precisou que o que está a facer o Goberno é "precisamente contabilizar, agora mesmo, cunha certa perspectiva, cal é o número real de falecidos por COVID-19".

Neste sentido lembrou que os epidemiólogos aseguran que ata que non pasen uns meses e estea superada definitivamente a pandemia, "non se poderá ter unha análise moito máis real e sosegada cunha certa perspectiva", polo que ata entón, non se poderá saber cal vai ser o número real de falecidos por COVID-19.

Sánchez defendeu que cando se modificaron as cifras de vítimas mortais, tanto ao aumentar como ao diminuír, foi por "criterios estritamente científicos e técnicos", e que serán os expertos quen estudarán despois o impacto real que tivo a pandemia en España.

"Isto está a ocorrer en todo o mundo, en todos os países é inevitable ter este debate, as pandemias teñen esta incógnita que só se pode resolver nuns meses, cando teñamos un coñecemento moito máis certo da enfermidade á que nos estamos enfrontando", comentou Sánchez.

"Moi poucos países tiveron esa rendición de contas, non soamente no Congreso dos Deputados, senón ante a opinión pública, como tivo España; é un motivo de orgullo, España rendeu contas ante si mesma", asegurou ao ser preguntado por un xornalista dun medio estadounidense sobre as continuas modificacións nas cifras de mortos por coronavirus.

Así, segundo Sánchez, "o Goberno mantivo desde o principio unha absoluta transparencia informativa, sobre todo nas cuestións vinculadas co COVID-19". "Demos datos diarios de todo tipo para que a cidadanía puidese entender non soamente desde o punto de vista cuantitativo, senón cualitativo, a que nos estabamos enfrontando", dixo.

RELANZAMENTO DO TURISMO "INMEDIATO"

Doutra banda, Pedro Sánchez afirmou que o relanzamento do turismo debe ser "inmediato" e que se debe proxectar nunha dobre dimensión, unha nacional e outra internacional. "É un dos grandes alicerces económicos e culturais", apostilou, tras afirmar que "desde moi pronto, en moi poucos días, vaise poder gozar das marabillas do país, que ofrecerá descanso, alegría e encontro tras meses devastadores".

Sánchez deixou claro que España é "un referente" en turismo e que os visitantes estranxeiros, dos que máis de 82 millóns visitaron o país en 2019, son "os mellores referentes" no sector do turismo. "Esperamos os visitantes desde o inicio do mes de xullo cos brazos abertos e con locais e hoteis seguros e preparados", engadiu.

"Os estranxeiros van gozar de algo moi importante: da seguridade sanitaria e do noso compromiso co medioambiente. Mentres o virus circule, en España van atopar seguridade e proximidade emocional", remarcou Sánchez.

Sánchez sinalou que a formulación que ten o Goberno é a de levantar a corentena cando finalice o estado de alarma para que "no mes de xullo se poidan recibir moitos turistas estranxeiros en España con garantías de seguridade, para eles e para o conxunto de poboación".