O que queda: a "vulnerabilidade anímica" dos maiores que pasaron sós o confinamento

A Fundación Amigos de Galicia fixo fincapé este luns na "vulnerabilidade anímica" das persoas maiores que pasaron esta etapa de confinamento en soidade, que "viron as súas rutinas paralizadas" e que "estiveron afastadas das súas familias e persoas de referencia" por mor da crise do coronavirus.

"Somos conscientes de que este illamento social ao que estiveron expostas estas persoas, independentemente do seu nivel económico, foi especialmente duro e afectou á súa saúde física, con importantes perdas de peso ocasionadas pola tensión e a ansiedade, e á súa saúde emocional", apunta a fundación.

Nun comunicado, subliñaron que "a principal vía de entretemento de moitas destas persoas maiores confinadas en soidade", sobre todo das que "non teñen dominio das novas tecnoloxías", foi ver a televisión, "infestada de malas noticias" en relación coa COVID-19.

A soidade, o illamento social e familiar e "a exposición a noticias deprimentes" fixeron "madeixa na saúde emocional nestas persoas", moitas das cales aínda seguen sen poder ver os seus achegados polas restricións de mobilidade.

En relación a esta cuestión, a entidade falou do sucedido a María Dolores Couceiro, integrante do padroado reitor de Fundación Amigos de Galicia, que aos seus 85 anos vive soa en Bastiagueiro, xa que o seu fillo reside en Madrid. Dolores sufriu este fin de semana un ICTUS e foi atopada na súa casa pola persoa que a coidaba, que se desprazou ao seu domicilio alertada por un membro de Fundación Amigos de Galicia que estivera chamándoa sen obter resposta.

Unha persoa maior mira pola ventá | Fonte: remitida