Bruxelas advirte dun "risco elevado" de incendios este verán

A Comisión Europea asegurou este martes que o risco de incendios en Europa este verán se sitúa por encima da media, tanto en número de focos como en superficie queimada.

Segundo explicou o comisario de Xestión de Crise, Janez Lenarcic, as proxeccións das institucións competentes nos estados membros sitúan o risco en "elevado". "Non digo que sexa máis elevado que o ano pasado que foi un verán marca en número de incendios e superficie calcinada, pero situarase por encima da media da última década", argumentou.

Lenarcic non quixo especificar que zonas calcula a Comisión que serán as máis castigadas polo lume este verán, aínda que advertiu que o risco non se circunscribe ao sur de Europa senón a outras zonas do centro e o leste do continente. "Hai incendios en lugares onde nunca o houbo ata agora", avisou.

Esta mensaxe transmitiuna nunha rolda de prensa na que informou da proposta de Bruxelas para dotar de maiores fondos o Mecanismo de Protección Civil, que actúa ante emerxencias naturais, no próximo orzamento comunitario.

A idea do Executivo europeo é que alcance un financiamento de 3.100 millóns, coa intención de crear reservas estratéxicas de equipamento para cubrir emerxencias sanitarias, pero tamén para combater os incendios forestais ou episodios de desastres químicos, biolóxicos, radiolóxicos e nucleares.

Incendio en San Vicente de Leira | Fonte: remitida