Denuncian a precariedade laboral dos investigadores de ámbito hospitalario en Galicia

InvestiGal-Rede Galega pola Investigación denunciou a "precariedade" e a "inestabilidade" laboral de investigadores do ámbito hospitalario en Galicia, contratados mediante fundacións biomédicas de xestión privada e a través do Servizo Galego de Saúde (Sergas).

A entidade criticou que as contratacións se leven a cabo "de modo precario e inestable, sen categoría profesional e con salarios dispares". Tamén asegurou que se incumpren as condicións descritas no Diario Oficial de Galicia (DOG) e o Boletín Oficial do Estado (BOE) para a "estabilización" dos investigadores.

En concreto, sinalou que as bases do programa de captación de talento Miguel Servet do Instituto de Salud Carlos III (ISCIII) estipulan que os investigadores que completen as dúas etapas establecidas deben integrarse en forma de persoal estatuario no servizo de saúde da correspondente comunidade.

No entanto, asegurou que, en Galicia, unha vez finalizado o programa, os investigadores son contratados por dous anos, con avaliacións anuais, de modo constante e que, en ocasións, perciben "unha remuneración salarial menor a pesar de dispor de máis experiencia e maiores responsabilidades".

Por este motivo, InvestiGal-Rede Galega pola Investigación acusou o Sergas e á Axencia de Coñecemento en Saúde (ACIS) de impedir o desenvolvemento dunha "carreira científica plena e con garantías" a estes investigadores e lamentou o "desgaste continuado" ao que ven sometidos "no plano mental e persoal".

CONSECUENCIAS

Así, afirmou que esta situación leva que os equipos que dirixen se vexan afectados e "perdan competitividade". Tamén sinalou que causa que estes profesionais "dediquen parte do seu tempo a lidar coa administración en lugar de poder concentrarse plenamente no seu traballo e nas súas investigacións".

Deste xeito, lembrou que o investigador do Instituto de Investigación Sanitaria de Santiago (IDIS) Manuel Collado, que dirixe un laboratorio sobre envellecemento e células nai, "afrontaba a súa última semana de contrato sen ningunha notificación oficial" hai uns días. Tras denunciar a súa situación en redes sociais, comunicóuselle a prolongación do seu contrato, despois do que tivo problemas para acceder ao seu correo electrónico corporativo.

Por iso, a entidade chamou ás administracións a "axudar e protexer o persoal investigador" e reclamou que as autoridades competentes rectifiquen "esta forma lesiva e irregular de proceder". Neste sentido, reclamou o desenvolvemento dun plan de estabilización e incorporación destes investigadores aos persoais dos hospitais.