O falecemento dunha muller de 76 anos eleva a 617 as vítimas mortais por coronavirus en Galicia
Os hospitais non comunicaran mortes nin o domingo nin o luns.
Por Galicia Confidencial | Santiago de Compostela | 02/06/2020 | Actualizada ás 21:37
O falecemento dunha muller de 76 anos que estaba ingresada no Hospital Lucus Augusti e que presentaba patoloxías previas eleva a un total de 617 as vítimas mortais ligadas á pandemia do coronavirus en Galicia.
Fontes da Consellería de Sanidade informaron do falecemento desta muller na xornada deste martes. Os hospitais non comunicaran mortes nin o domingo nin o luns.
Desta forma, o Sergas constata que desde o inicio da pandemia morreron 485 en atención hospitalaria e 132 dentro de residencias de maiores.
Os días sen mortes atribuídas á pandemia en hospitais foron os pasados 29 de abril, 14, 18, 19, 25, 27, 28, 29, 31 de maio, e 1 de xuño.
A primeira vítima mortal deste virus rexistrouse o 14 de marzo, unha muller de 92 anos que se atopaba ingresada no Hospital Povisa de Vigo. Nesa mesma xornada producíase tamén a morte dun home de 81 anos ingresado en Pontevedra e que deu positivo na proba de COVID-19.
Neses días, os primeiros da alerta sanitaria en Galicia, nos que había menos de 300 casos activos, houbo dúas xornadas nas que non se rexistrou ningunha morte hospitalaria, o 15 de marzo e o 17 de marzo.
A partir do 18, cando as vítimas mortais en Galicia ascendían xa a catro persoas, os hospitais galegos comunicaron falecementos todos os días, agás en dez ocasiones.
