Galicia supera as 10.000 persoas curadas e os casos activos baixan a 678
Unha persoa permanece ingresada na UCI.
Por Europa Press / Redacción | VIGO | 03/06/2020 | Actualizada ás 12:17
O número de casos activos de COVID-19 en Galicia baixou a 678 (29 menos que na xornada do martes) e as altas epidemiolóxicas (persoas curadas) superan as 10.000, segundo os datos trasladados este mércores pola Consellería de Sanidade.
Así, Sanidade informou de que, do total de casos activos, 257 correspóndense coa área sanitaria de Vigo, 147 coa área da Coruña, 130 son da área de Santiago, 60 correspóndense coa área de Ourense, 39 coa de Lugo, 25 coa de Pontevedra e 20 son da área sanitaria de Ferrol.
Con respecto aos pacientes ingresados, hai unha persoa que permanece na UCI (fronte ás 3 das que se informou hai un día) e outras 28 en unidades convencionais de hospitalización, unha máis que nas últimas horas. Así mesmo, hai outras 649 persoas que se recuperan nas súas casas con seguimento domiciliario (28 menos), e o número de curados ascende a 10.033, o que supón 42 altas epidemiolóxicas máis nas últimas horas.
En canto ás probas de detección do virus, Sanidade informou da realización doutras 1.418 probas nas últimas horas, co que o número total de PCR realizadas en Galicia ascende a 145.644.
Sanidade tamén ratificou que, ata este mércores, faleceron con COVID en Galicia 617 persoas, a última delas unha muller de 76 anos que estaba ingresada no Hospital Lucus Augusti de Lugo. Dos falecidos, hai 273 persoas vinculadas con residencias, un 44,2 por cento do total de vítimas mortais do coronavirus na comunidade.
