Unha concelleira de Ciudadanos abandona o partido aínda que seguirá no cargo

A alcaldesa da Coruña, Inés Rey, subliñou a "oposición construtiva" da edil Mónica Martínez, ao ser preguntada pola decisión desta de darse de baixa como militante en Ciudadanos, aínda que seguirá como concelleira no consistorio coruñés.

"Respectamos a decisión", dixo a rexedora, quen enmarcou a mesma nunha cuestión vinculada ao "ámbito persoal" polo que non quixo entrar en máis valoracións.

Con todo, agradeceu "o labor e o traballo" de Mónica Martínez, á que definiu como unha persoa "seria" e "responsable". "Coa que se pode traballar e dialogar, máis aló de diferenzas ideolóxicas", sentenciou nunha comparecencia para presentar novas medidas no ámbito da hostalaría, xunto ao concelleiro da Coruña de Economía, José Manuel Lage.

MAREA ATLÁNTICA

Marea Atlántica cualificou como unan "estafa ao electorado" que a edil Mónica Martínez siga como concelleira tras deixar de militar en Ciudadanos, segundo comunicou esta semana despois de concorrer nas eleccións municipais como cabeza de lista pola formación laranxa.

Nun comunicado, sostén que, coa súa decisión, Mónica Martínez "estafa ás 7.245 veciñas e veciños que lle deron o seu voto nas municipais de 2019 ao aferrarse ao seu escano".

"Estas persoas optaron por unha opción política, coa que non coincidimos pero que respectamos, e non merecen ser privadas da representación que escolleron nas urnas".

Marea Atlántica lembra que debe ser Ciudadanos "quen lle reclame a acta", pero sostén que, ao seu xuízo, "a opción máis honesta, cando un representante público abandona o partido co que concorreu ás urnas, é deixar o escano e permitir que corra a lista electoral en lugar de caer en prácticas personalistas e pouco aconsellables no noso sistema democrático".

"Esperamos, en todo caso, que o goberno de Inés Rey non teña a tentación de reforzar a súa posición minoritaria e as evidentes carencias do seu equipo incorporando a unha concelleira que se aferra a un escano que non lle pertence", advirte. "Un caso de transfuguismo danaría enormemente a reputación do Concello da Coruña", apostila.