O Goberno central anuncia que abrirá a fronteira con Francia e Portugal cando remate o estado de alarma

O Goberno español anunciou este xoves que abrirá a fronteira con Francia e Portugal cando termine a última prórroga do estado de alarma, que vence ás 00.00 horas do próximo 21 de xuño. A información proporcionouna a ministra de Industria, Comercio e Turismo, Reyes Maroto.

O restablecemento dos controis nas fronteiras interiores de España con Francia e Portugal entrou en vigor o pasado 17 de marzo a través dunha orde ministerial ao amparo do estado de alarma. De modo que cando venza o estado de alarma, decaerán con el todas as ordes ministeriais vinculadas a este instrumento. Por iso o Executivo xa está a traballar nun real decreto lei para manter a vixencia das medidas sanitarias e doutro tipo que considere necesario preservar.

Co peche da fronteira terrestre a viaxeiros, só se permite o acceso desde Francia e Portugal a cidadáns españois; persoas residentes en España; traballadores transfronteirizos e aqueles que acrediten, documentalmente, causas de forza maior ou situación de necesidade. A restrición non se aplica ao transporte de mercadorías co fin de asegurar a continuidade da actividade económica e de preservar a cadea de abastecemento.

A medida tampouco afecta o persoal estranxeiro acreditado como membro das misións diplomáticas, oficinas consulares e organismos internacionais sitos en España, sempre que se trate de desprazamentos vinculados ao desempeño de funcións oficiais.

Nun almorzo cos xornalistas estranxeiros, Maroto explicou que a corentena que se impón ás persoas que acceden desde o estranxeiro irase levantando en función de acordos de reciprocidade cos distintos países e tendo en conta a situación epidemiolóxica desas nacións, é dicir, se están ou non nunha situación similar á de España no que ao control da enfermidade refírese.