O PP reprocha a "absoluta desaparición durante esta pandemia" do alcalde de Pontevedra

O presidente do Partido Popular de Pontevedra, Rafa Domínguez, compareceu este venres para realizar un balance do primeiro ano desde as últimas eleccións municipais no que criticou ao alcalde da cidade do Lérez, Miguel Anxo Fernández Lores, pola súa "absoluta desaparición durante esta pandemia".

Segundo manifestou o dirixente popular, "o alcalde non soubo xestionar esta crise, nin soubo aproveitar a boa disposición da oposición para facer unha fronte común para traballar na recuperación", dixo en referencia ao voto do goberno local en contra da creación dunha comisión da reconstrución.

"Como cando avogabamos por non cobrar a taxa de veladores, Lores dicía que non e non facía nada", lamentou, para aludir ás peticións de redución do imposto de lixos, de incremento significativo para as partidas sociais, ou o trato ao comercio, á hostalaría e aos autónomos durante a pandemia. "Cando máis necesitaban ao alcalde, Lores falloulles", dixo.

Sobre o goberno local, formado por BNG e PSOE, Domínguez considera que "en realidade hai dous gobernos, independentes, que non se comunican entre eles, que non levan ben entre eles e que gobernan de formas separadas".

O Partido Popular tamén reprochou que na área social, Pontevedra segue sendo "dos últimos concellos en gasto social por habitante" e destacou que, "a pesar do incremento das necesidades, non se aumentou de forma evidente as partidas orzamentarias e, cando se fixo, foi de forma escasísima".

Por último, o presidente local do PP agradeceu o traballo e dedicación dos seus concelleiros para destacar "o bo ambiente entre todos, que fai moito máis agradable o traballo".