Detido un mozo que realizaba unha viaxe interprovincial con 2.000 doses de cocaína para a súa venda

A Garda Civil detivo este xoves nun control de estrada a un mozo da Coruña ao que se lle incautou droga no seu vehículo. Ademais, está denunciado por non respectar a prohibición dos desprazamentos interprovinciais.

En concreto, ao mozo detido de 24 anos incautáronlle 2.000 doses de cocaína para a venda  durante un punto de verificación na AP-9, PK 110, localidade de Caldas de Reis (Pontevedra).

Segundo informou a Garda Civil nun comunicado, ao parar os vehículos os axentes detectaron que levaba unha sustancia oculta nunha parte do vehículo, polo que o detiveron e acusárono dun suposto delito contra a saúde pública por tráfico de drogas.

O condutor tamén foi denunciado por non respectar o confinamento que determina o vixente estado de alarma pola crise sanitaria da COVID-19, ao non respectar o desprazamento interprovincial sen causa xustificada.