Centos de traballadores de Alu Ibérica reclaman a "intervención pública" da planta da Coruña
Na Mariña, milleiros de persoas participaron na manifestación convocada polo comercio de Xove para reivindicar un futuro para a planta de aluminio de Alcoa-San Cibrao,
Por E.P. | SANTIAGO DE COMPOSTELA | 06/06/2020 | Actualizada ás 16:05
Centos de traballadores de Alu Ibérica reclamaron este sábado a "intervención pública" da planta na Praza de María Pita da Coruña para evitar o seu peche e "reivindicar a súa situación".
O vindeiro xoves, 11 de xuño, celebrarase a Mesa Técnica co Ministerio de Industria para abordar a situación da factoría. Este sábado os empregados xa deixaron claro cales son as súas reclamacións e o camiño que convidan a seguir. "Se o xoves non hai unha contestación clara por parte do Ministerio de Industria, tomaremos a nosa iniciativa para defender os postos de traballo", explicou o presidente do comité, Juan Carlos López Corbacho.
Considera que o Executivo "non pode porse de perfil" e instouno a "deixar a desidia e a falta de implicación", xa que cre que "este conflito" é froito dun "proceso de Maroto" e que "o seu Ministerio está implicado ata as últimas consecuencias" polo que, "de fracasar este proceso os últimos responsables co Ministerio e o Goberno de España".
ALCOA
Pola súa parte, na Mariña participaron milleiros de persoas nunha manifestación convocada polo comercio de Xove para reivindicar un futuro para a planta de aluminio de Alcoa-San Cibrao.
"Convocamos esta manifestación porque nos sentimos verdadeiramente ameazados", asegura Juan Carlos López, presidente da Asociación de Comerciantes, Industriais e Autónomos (Aciam). "A economía da Mariña xira en torno a Alcoa e un peche sería un desastre", sostén.
Ruído de camións e signos de loito encheron a xornada de protesta en Xove. [Podes ler a información completa e ver o vídeo da manifestación no Xornal da Mariña]
