A Xunta permite utilizar a totalidade dos asentos do transporte público a partir deste martes
Con todo, di que será obrigatorio o uso da máscara e priorizar o pago con dispositivos electrónicos.
Por Europa Press / Redacción | SANTIAGO DE COMPOSTELA | 09/06/2020 | Actualizada ás 12:41
Os usuarios do transporte público poden utilizar desde este martes a totalidade dos asentos, unha resolución que, en base ás novas medidas de desconfinamiento, publica a Xunta no Diario Oficial de Galicia (DOG).
Segundo lembra a Consellería de Infraestruturas e Mobilidade, "para garantir unha mobilidade segura", os viaxeiros deberán empregar obrigatoriamente a máscara e priorizar o pago con dispositivos electrónicos, como o cartón TMG, para evitar o contacto.
Nos vehículos e embarcacións que dispoñan de asentos, os viaxeiros poderán facer uso da súa totalidade, deixando a máxima separación entre as persoas, cando o nivel de ocupación o permita.
Nos medios de transporte con prazas de pé, as persoas deberán manter entre si a máxima distancia posible, fixando como referencia a de dous viaxeiros por cada metro cadrado na zona habilitada para viaxar de pé.
A resolución atende ás novas disposicións establecidas polo Ministerio de Transportes, Mobilidade e Axenda Urbana e por Sanidad para flexibilizar certas limitacións na prestación dos servizos de transporte público.
"Estas medidas teñen como obxectivo compatibilizar a progresiva flexibilización das condicións de ocupación do transporte coas prioritarias garantías sanitarias", lembra a Xunta, que di que se trata de garantir "unha mobilidade segura no transporte público, que está a rexistrar un incremento de usuarios nas últimas semanas" co aumento paulatino dos desprazamentos dos cidadáns.
