O Goberno central avanza que Galicia entrará na nova normalidade o vindeiro luns abandonando a desescalada

O Goberno aceptou a solicitude de Galicia de abandonar de forma anticipada a fase 3 do plan de desescalada, polo que o vindeiro luns entrará no que se denominou a nova normalidade, tal e como informou o ministro de Sanidade, Salvador Illa. Isto convértea na primeira comunidade que abandona o estado de alarma, declarado o 14 de marzo e que seguirá en vigor ata o 21 de xuño.

O ministro de Sanidade, Salvador Illa.. Moncloa

TRES DE CADA CATRO PERSOAS EN FASE 3

Illa explicou que 10 millóns de cidadáns se suman á fase 3 e serán xa 34 millóns en total, tres de cada catro. "A epidemia está a evolucionar ben, pero hai que manter a prudencia e ter un comportamento individual exemplar e respectando os consellos das autoridades sanitarias", engadiu o ministro.

A partir do 21 de xuño as únicas ordes sanitarias que rexerán serán as do real decreto sobre nova normalidade aprobado. O ministro recalcou que a partir dese día os cidadáns poderán moverse libremente por todo o territorio estatal. Engadiu que as comunidades autónomas poderán tomar decisións de saúde pública segundo as súas competencias.

MOBILIDADE

A partir do domingo 21 de xuño poderase circular con liberdade por todo o estado ao decaer o estado de alarma, independentemente de que para entón poida haber zonas como a Comunidade de Madrid, a área metropolitana de Barcelona ou provincias castelán-leonesas que non culminasen todas as fases do plan de desescalada.

Illa, acompañado do doutor Fernando Simón, explicou que sen o instrumento do estado de alarma non é posible restrinxir de maneira xeral un dereito fundamental como o estado de alarma que demostrou a súa eficacia e que o Executivo volverá utilizar se é preciso.

Sen o estado de alarma, Simón explicou que a lexislación actual só permite proceder a confinamentos "cirúrxicos" da poboación, como pode ser limitando os movementos de grupos de persoas determinadas que estivesen en contacto con algún infectado.