As cirurxías menores non oncolóxicas volverán a practicarse a partir do venres día 19 de xuño
O Sergas indica que "se consolida a recuperación da normalidade na actividade hospitalaria, recuperándose a funcionalidade e estrutura das plantas de hospitalización, a carteira de servizos e a programación de consultas, probas e intervencións cirúrxicas".
Por Europa Press / Redacción | SANTIAGO DE COMPOSTELA | 14/06/2020 | Actualizada ás 12:24
Os hospitais do Servizo Galego de Saúde (Sergas) recuperarán a partir do próximo venres 19 de xuño a cirurxía menor hospitalaria non oncolóxica ao avanzar á cuarta e última etapa do plan de reactivación asistencial no marco da crise sanitaria polo coronavirus COVID-19.
Así o sinala o 'Plan de reactivación asistencial no ámbito hospitalario en relación coa infección polo virus SARS-CoV-2', que indica que do 19 de xuño ao 3 de xullo avánzase á cuarta e última etapa.
Nesta cuarta etapa do plan o Sergas indica que "se consolida a recuperación da normalidade na actividade hospitalaria, recuperándose a funcionalidade e estrutura das plantas de hospitalización, a carteira de servizos e a programación de consultas, probas e intervencións cirúrxicas".
No entanto, incide o protocolo que se manterán "todas as medidas referidas nas etapas anteriores, potenciando a consulta non presencial, a xestión de citas que evite as aglomeracións de persoas nas salas de espera ou a axilización das altas".
Ademais, sinala que seguirán os circuítos diferenciados e as áreas COVID-19 "en previsión de posibles brotes da enfermidade, dimensionando os mesmos en función da demanda asistencial".
Entre outros aspectos, este plan destaca que na etapa 4 retomarase a actividade relacionada coa investigación, "permitíndose a monitorización presencial dos ensaios clínicos".
VISITA MÉDICA
En canto á visita médica por parte da industria farmacéutica, o protocolo sinala que poderá iniciarse "con cita previa, evitando permanecer nas plantas hospitalarias ou calquera outra zona do ámbito asistencial".
Tamén se reiniciarán as auditorías internas de seguridade do paciente (identificación inequívoca de pacientes, hixiene de mans, uso seguro de cloruro potásico, etc.) e as auditorías externas de acreditación nas normas UNE/ISO.
Así mesmo, o plan destaca que se retomará o desenvolvemento do Plan galego de hospitalización a domicilio, especialmente no referente ao seguimento compartido con Atención Primaria e centros sociosanitarios.
CONSULTAS E CIRURXÍA
Na área concreta de consultas externas iniciaranse as consultas de seguimento conxunto por parte dos servizos hospitalarios implicados na mesma patoloxía.
Segundo consta no plan, para o desenvolvemento deste tipo de consulta "realizaranse protocolos nos que se contemple a atención compartida dos pacientes, a citación no mesmo día das especialidades médicas que interveñen nesa atención e a solicitude de probas diagnósticas que evite duplicidades".
Así mesmo, indícase que se protocolizarán as consultas de revisión, "contemplando a súa realización, polos especialistas implicados na patoloxía, ben no mesmo día ou ben de maneira alterna".
Tamén nesta cuarta etapa potenciarase a "priorización dos pacientes derivados ao hospital (consultas externas) a través de vías clínicas específicas".
No ámbito da área cirúrxica, entre as medidas específicas sinálase que se manterán as establecidas para a etapa 3 e, ademais, iniciarase a cirurxía menor hospitalaria non oncolóxica.
PSIQUIATRÍA
A etapa 4 recolle, ademais, varias medidas específicas para os servizos de Psiquiatría, polas que os pacientes poderá realizar saídas á contorna urbana "evitando lugares onde se concentren moitas persoas". Ademais, incide o plan que "atenderán as medidas de distanciamento social e utilizarán máscara".
Co avance de etapa, a partir do 19 de xuño, permitiranse visitas diarias "por unha soa persoa" e para o resto de aspectos específicos o documento resalta que "seguirán resultando de aplicación" as medidas da etapa 3.
En canto ao Hospital de Día de Psiquiatría este plan de reactivación asistencial no ámbito hospitalario recolle que "poderán realizarse actividades de tipo comunitario fose do recinto hospitalario, en grupos de máximo oito persoas incluíndo o persoal".
Como novidade no cambio de etapa nas unidades de saúde mental realizarase "unha avaliación dos programas de apoio psicolóxico aos profesionais e de intervención en dor e trauma", concreta o documento.
Para o resto de aspectos específicos, tanto no programa xeral como nos programas sociosanitarios, unidades de psicogeriatría, unidades de psquiatría infantojuvenil e programas de psiquiatría e ligazón mantense a aplicación das medidas adoptadas na terceira etapa.
