Ence di querer axudar na recuperación económica tras a COVID coa contratación de titulados de FP
En total, 16 mozos traballarán durante un ano nos distintos departamentos que a compañía ten en Pontevedra no ámbito forestal e no industrial.
Por E.P. | SANTIAGO DE COMPOSTELA | 18/06/2020 | Actualizada ás 16:19
A fábrica de Ence en Lourizán contratará 16 titulados en segundo ciclo de Formación Profesional, que traballarán durante un ano en diferentes departamentos da compañía en Pontevedra.
O vicepresidente da Xunta, Alfonso Rueda e a conselleira de Medio Ambiente, Territorio e Vivenda, Anxos Vázquez, presentaron o este xoves xunto co director territorial de Ence, Antonio Casal, o convenio subscrito para a citada contratación e que enmarcaron como medida "para contribuír a paliar a crise derivada da emerxencia sanitaria pola covid-19".
Antonio Casal explicou que o departamento de capital humano da fábrica empezará esta contratación "inmediatamente" e que estes 16 mozos traballarán durante un ano nos distintos departamentos que a compañía ten en Pontevedra no ámbito forestal e no industrial. Para iso, destinarase medio millón e euros.
"Unha mostra máis do compromiso coa sociedade que está reflectido dentro do Plan Social que cada ano levamos adiante", asegurou, e que cuantificou en 3 millóns de euros en proxectos sociais, deportivos e culturais en Pontevedra, Marín e Poio.
A conselleira de Medio Ambiente, pola súa banda, valorou "o compromiso de Ence coa contorna", mentres que Rueda destacou que foi a propia compañía a que se puxo en contacto co Goberno autonómico para realizar esta proposta, que permitirá a estes mozos gañar experiencia no mercado laboral cun "emprego de calidade.
