As previsións dun informe de Adecco sinala que o emprego subirá en Galicia un 20% durante o verán
Os posibles aumentos estarán ligados á hostalaría, turismo, transporte e todo o sector comercial.
Por E.P. | SANTIAGO DE COMPOSTELA | 19/06/2020 | Actualizada ás 13:57
A campaña de verán creará 45.100 contratos en Galicia, o que supón un 19,8% máis que os realizados durante o estado de alarma, segundo as previsións de Adecco.
Este incremento en Galicia, marcado polo turismo e a hostalaría, será lixeiramente superior ao avance medio na contratación que se prevé en España (+19,3%,) entre xuño e setembro, respecto dos meses do confinamento.
Por provincias, A Coruña liderará a campaña galega con máis de 22.200 empregos (un 20% máis que durante os meses previos), seguida de Pontevedra (17.200, +19,5%) e Lugo (3.100, +22%). Por último, en Ourense asinaranse 2.400 contratos (+18%).
Así, aumentarase a contratación en sectores vinculados ao turismo e hostalaría como o aeroportuario, os servizos, transporte e loxística, distribución e retail, así como comercial e 'contact center'.
Nun comunicado, o director de Adecco Staffing, Carlos Villacastín, asegurou que a campaña de verán será "atípica, como o está sendo todo este 2020". "Hai que aprender novos protocolos nos postos de traballo, o sector do turismo viuse fortemente golpeado polo estado de alarma e aínda hai incerteza por medo a rebrotes sanitarios", explicou.
NOVOS PERFÍS
Os cociñeiros, os camareiros, os preparadores de pedidos, os comerciais, dependentes, promotores, mozos de almacén, repartidores e teleoperadores serán algúns dos perfís máis demandados do verán.
A estes únense os novos profesionais necesarios pola crise sanitaria. Entre eles, atópanse os desinfectadores de roupa e espazos, auxiliares de praia --para vixiar accesos e aglomeracións--, controladores de temperatura en edificios e espazos públicos, así como rastreadores do virus --fan seguimento dos contagios--.
