Carmela Silva carga contra a "turismofobia" e agarda que as Rías Baixas sexan destino de moitas persoas

A presidenta da Deputación de Pontevedra, Carmela Silva, insistiu en que "Rías Baixas é un destino seguro" e cargou contra a "turismofobia" para defender un sector "potentísimo e xera unha gran actividade económica e moito emprego".

Co levantamento este domingo do estado de alarma, os cidadáns poderán circular libremente entre autonomías, unha circunstancia que o sector turístico das Rías Baixas agarda coa esperanza de que este sexa un dos destinos vacacionais de moitos de españois.

"As persoas que nos veñan visitar son ben recibidas", dixo a presidenta provincial, quen lembra que "cando o presidente da Xunta leva un mes ou máis pedindo a mobilidade interprovincial, é que ten claro que hai garantía sanitaria".

En todo caso, fixo un chamamento á responsabilidade cidadá para cumprir coas recomendacións ditadas polas autoridades sanitarias ante posibles rebrotes, "porque o virus está aquí". Ademais pide ao presidente da Xunta de Galicia, Alberto Núñez Feijóo que "tome decisións e dedique recursos" para "garantir" que "todas as medidas de seguridade están postas en marcha ao cento por cento".

Neste sentido, Carmela Silva destacou o "enorme esforzo" que fixeron o sector privado e os municipios e apelou á responsabilidade individual, porque "cumprir coas normas aínda é máis importante" e "é unha responsabilidade compartida por toda a sociedade". "Agora todo depende de todos nós", resolveu.

A presidenta da Deputación de Pontevedra, Carmela Silva, durante a súa intervención. PABLO HERNÁNDEZ GAMARRA/DEPUTACIÓN DE PONTEVEDRA / Europa Press