Correos inicia a entrega da documentación electoral para o exercicio do voto por correo

Realizará, polo menos, "dous intentos de entrega en man a propio destinatario".

Por E.P. | SANTIAGO DE COMPOSTELA | 22/06/2020 | Actualizada ás 11:50

Comparte esta noticia

Correos inicia este luns a entrega da documentación electoral aos cidadáns que solicitaron o voto por correo para as eleccións aos Parlamentos de Galicia e País Vasco. Segundo informou Correos nun comunicado, as Delegacións Provinciais da Oficina do Censo Electoral, tras comprobar a inscrición dos solicitantes no censo, remiten os envíos coa documentación electoral á dirección indicada polo elector na súa solicitude, con carácter certificado e urxente.

"Conforme as Delegacións da Oficina do Censo van depositando estes envíos, a empresa postal pública vai sacándoos a repartición", explicou Correos, que distribúe esta documentación e, engade, "responsabilízase de realizar polo menos dous intentos de entrega en man ao propio destinatario, deixando un aviso para que vaia a recollela á súa oficina de referencia en caso de non poder realizar a entrega en persoa".

A entrega da documentación electoral realízase persoalmente ao destinario no domicilio que se especifica, lembra a entidade, que incide en que "só pode ser recollida polo elector ou o seu representante en caso de enfermidade ou discapacidade acreditadas".

Para recibir esta documentación, o elector debe exhibir o seu DNI, pasaporte ou permiso de condución orixinais. O empregado de Correos anota o número de documento identificativo e dá fe da recepción persoal da documentación necesaria para votar, sen que sexa imprescindible que o elector firme esta entrega.

Imaxe de recurso de voto por correo. EUROPA PRESS - Arquivo
Imaxe de recurso de voto por correo. EUROPA PRESS - Arquivo | Fonte: Europa Press

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta