G. Caballero: "Nós imos defender a sanidade e a educación despois de tantos anos de recortes"

O candidato do PSdeG á Presidencia da Xunta, Gonzalo Caballero, chamou a todos os progresistas a votar nas próximas eleccións do 12 de xullo ao Partido Socialista convencido de que "é o único voto que ten un efecto multiplicador para o cambio".

Gonzalo Caballero lanzou esta mensaxe no primeiro mitin de campaña que ofreceu acompañado polo ministro de Cultura, José Manuel Rodríguez Uribes, en Redondela, onde asegurou que "por un só voto pódese decidir un goberno" e pediu "que non haxa nin un só progresista que se poida quedar en casa".

"Todos os que votaron a Pedro Sánchez ao longo de 2019, todas as persoas que votaron para ter a un alcalde ou alcaldesa socialista, teñen agora unha tarefa. Temos que sacar a Feijóo", manifestou o socialista.

E é que, na súa opinión, "aqueles que recortaron en sanidade, que privatizaron e destruíron o emprego non están agora en condicións de liderar un tempo de futuro para Galicia". "Nós imos defender a sanidade e a educación despois de tantos anos de recortes", proclamou.

Na súa intervención, ademais, asegurou que despois de que a Xunta "reculase" co peche do paritorio de Verín, na xornada deste venres volveu a "recular". "Acaba de retirar o cheque --en referencia ao bono de 250 euros a sanitarios para gastar en turismo-- porque os defensores da sanidade gañámoslle de novo unha batalla ao presidente da indignidade de Galicia", celebrou.

O candidato do PSdeG á Presidencia da Xunta, Gonzalo Caballero; o ministro de Cultura, José Manuel Rodríguez Uribes; e o alcalde de Vigo, Abel Caballero, nun paseo pola cidade olívica. ANDRES FRAGA / ANDRES FRAGA / Europa Press