Renfe adxudica a CAF o primeiro contrato do seu plan de renovación de trens por 258 millóns

Renfe adxudicou a CAF o primeiro contrato do plan de renovación da súa frota, o que abarca a subministración de 31 novos trens de vía estreita e seis de proximidade, ademais do posterior mantemento de parte dos vehículos, por un importe de 258 millóns de euros, segundo informou a operadora.

Trátase da primeira compra de novos trens da compañía ferroviaria pública en máis de tres anos, desde que a finais de 2016 adxudicou o pedido dos seus novos trens AVE a Talgo. O contrato, adxudicado na reunión do consello de administración deste luns, enmárcase no plan de renovación da frota que Renfe mantén a pesar da crise co fin de "rexuvenecer o seu parque de trens, aumentar a súa eficiencia e mellorar a súa fiabilidade e accesibilidade".

Dos 37 convois mercados, 6 deles irán parán á liña de proximidade Cercedilla-Cotos de Madrid, "dunha antigüidade de máis de corenta anos", segundo detallou Renfe. Os restantes 31 irán parar á cornixa cantábrica, que inclúe traxectos entre Galicia, País Vasco, Cantabria, Asturias, e Castela e León.

En concreto, a renovación dos convois afectará a un total de 3 traxectos regulares, todos saíntes de Ferrol. A nivel de proximidade, permitirá actualizar o tren da vía Ferrol-Ortigueira, mentres que no tocante á comunicación entre comunidades terá como obxectivo a conexión Ferrol-Oviedo. Tamén abraguerá o enlace entre Ferrol e Ribadeo.