Extremoduro ameaza con denunciar a Live Nation se non devolve o diñeiro das entradas dos concertos suspendidos

Extremoduro aprazou oficialmente a súa xira de despedida o pasado 8 de maio, apenas unha semana antes das dúas primeiras datas previstas en Valencia. Desde entón, nada se sabía respecto diso. Ata agora. Porque o líder do grupo, Robe Iniesta, explica nun comunicado  que están "a ter problemas" para anunciar as novas datas unha vez consumado o adiamento por culpa do coronavirus.

"Seguimos pensando que a obriga de todos é estar preparados para traballar xusto no momento que se poida. Pero ninguén sabe se imos poder tocar no outono, e estamos a ter todo tipo de dificultades. Por iso de momento non podemos anuncialas", explica Robe.

E engade: "A idea era que a xira empezase a finais de agosto ou principios de setembro. Así que imos fixar o 31 de xullo para saber se se fai ou non. Se ese día xa non hai absolutamente ningunha restrición nin de aforamentos nin de máscaras nin de xeles nin de poder abrazarse e bicarse con lingua con descoñecidos, entón faremos a xira. Se ese día non saíu ningún tratamento efectivo e continuamos tendo que manter as distancias, entón levarémola a primavera do ano que vén".

Ante esta incerteza, Extremoduro esixiu á promotora Live Nation, como condición, que devolva o diñeiro das entradas a quen o solicite, aínda que non estean anunciadas as novas datas concretas".

"O noso acordo con eles di que están obrigados a xestionar a devolución do importe íntegro ao que o pida, inmediatamente despois de anunciarse a suspensión ou adiamento dos concertos. Se seguen teimando na súa postura, o seguinte será polo en coñecemento dun xuíz", termina o comunicado.

A xira contemplaba unha única parada en Galicia, planeada para mediados de xuño no Monte do Gozo de Santiago de Compostela.