Por Europa Press / Redacción | SANTIAGO DE COMPOSTELA | 02/07/2020 | Actualizada ás 14:21
Os concelleiros de Marea Atlántica abandonaron temporalmente o pleno ordinario que a corporación municipal da Coruña celebra este xoves tras un cruce de ataques cos socialistas e en protesta polo que cualificaron "un abuso de autoridade" por parte da alcaldesa, Inés Rey, no seu papel como presidenta da sesión plenaria.
A orixe do abandono foi a decisión da alcaldesa de non permitir que o concelleiro Xiao Varela interviñese fóra da súa quenda e unha vez esgotara o seu tempo, recalcaron fontes do goberno local. O edil mostrou o seu malestar ante a decisión da rexedora e preguntoulle se ía poder intervir, o que Rey non permitiu. O concelleiro asegurou entón que se non podía falar íase do pleno, seguíndolle os demais concelleiros. Antes a alcaldesa recriminoulle a súa actitude. "Non vou tolerar que me tome o pelo", expuxo.
REPROCHES POLA XESTIÓN CULTURAL
Previo a este enfrontamento, xa se produciron reproches entre o concelleiro Iago Martínez e o socialista e portavoz do goberno local, José Manuel Lage, tras as críticas do primeiro sobre a xestión en materia de cultura e o "axuste de 700.000 euros" na partida do Instituto Municipal Coruña Espectáculos (IMCE), motivado polo plan aprobado pola corporación municipal para destinar partidas a outros fins ante a crise sanitaria. Para Marea Atlántica, trátase dun "recorte" xa que, ao seu xuízo, poden destinarse partidas "en defensa da programación cultural" e "non necesariamente a festas", apuntaron a Europa Press desde esta formación ao ser preguntados polo ton do debate suscitado no pleno.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.