Por Europa Press / Redacción | SANTIAGO DE COMPOSTELA | 03/07/2020 | Actualizada ás 13:00
A Vicesecretaría Xurídica de Vox denunciou ante a Xunta Electoral de Galicia dúas concentracións convocadas por grupos denominados antifascistas contra os mitins que o partido prevé celebrar nas cidades de Lugo e A Coruña este fin de semana.
Segundo advirte a formación a través dun comunicado, trátase de dúas mobilizacións organizadas por "grupos radicais" e "violentos", para as que piden "a acción policial necesaria" para que non se produzan e que os seus actos de campaña se poidan desenvolver "sen presións e sen risco para a integridade física" dos asistentes.
En concreto, Vox denunciou ante a Xunta Electoral galega dúas concentracións convocadas por plataformas denominadas "antifascistas", principalmente a través de redes sociais. A primeira, este venres en Campo Castelo en Lugo, e a segunda, fronte ao Palexo na Coruña organizada por Acción Antifascista, coincidirán cos mitins que ofrecerá o presidente do partido, Santiago Abascal.
Por iso, a formación reclama que as forzas e corpos de seguridade do Estado impidan "que se poida coaccionar aos asistentes e convocantes destes actos", que "non están a poder desenvolver as súas actividades con normalidade" durante a campaña das eleccións vascas e galegas do 12 de xullo. E é que, segundo Vox, "todos os actos" do partido son recibidos con concentracións "ilegais" convocadas por "grupos radicais e violentos de extrema esquerda" que, nalgúns casos, "chegaron a agredir aos asistentes".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.