Usuarios de maiores presentan unha nova querela contra DomusVi por homicidio imprudente

A familia da residente nas instalacións de DomusVi Matogrande denuncia á empresa de “non prestarlle asistencia médica unha vez diagnosticada pola COVID-19, limitándose a confinala nun cuarto da residencia esperando o seu falecemento”.

Por este motivo a querela vai dirixida contra a xerente de DomusVi, Josefina Fernández e a directora da residencia de Matogrande.

Cando os familiares tiveron coñecemento de que a anciá dera positivo por coronavirus, pediron á residencia que trasladase á doente ao hospital clínico da Coruña (CHUAC). Segundo a denuncia presentada, a residencia negouse a trasladar á usuaria ao hospital.

Os motivos que aludiron foron que non era “candidata a ser tratada na UCI”. A mesma residencia remarcou que só trasladarían as persoas que “estivesen en condicións de ser salvadas”.

Durante o período en que os parentes foron informados ata o falecemento da usuaria, só puideron vela “dúas veces por vídeochamada”, a pesar da insistencia en poder vela en persoa. A querela apunta ademais que a residente falecida en Matogrande “non estaba alimentada nin atendida nin vixilada”. Tamén denuncian que non foi auxiliada nas súas necesidades básicas de subsistencia.